CHA demanda que o Mar d’Aragón siga Paisache Protechiu ta empachar a pesca ilegal

A nueit d'o lunes se incautoron 2500 kg de carpas pescadas ilegalment

carpasCHA ha considerau “muito grieu” a situación de descontrol y ilegalidat que se vive dende fa anyadas en as orillas d’a Mar d’Aragón y demanda, unatra vegada, que se creye a figura de Paisache Protechiu d’a Mar d’Aragón “ta que se pueda contar con recursos humanos y tecnicos que faigan rematar o problema que bi ha”.

Rafael Lumbreras, portavoz d’ista formación en o concello de Casp, recorda que “bi ha pocas ferramientas ta acotolar as mafias que agafan carpas de trazas ilegals ta vender-las en atros países” y mete d’eixemplo a nueit d’o lunes quan se incautoron 2.500 kg de carpas presas con retes de trazas ilegals“.

Chunta acusa a lo Gubierno d’Aragón de “no estar fendo cosa” y critica que “lo unico que ha sabiu fer ye admitir una propuesta zaborrera de coto esportivo de pesca, prebar de privatizar l’emplego d’as plachas con un prochecto que va en contra d’as leis autonomicas y estatals y que, ye de dar que caldrá reformular”.

A propuesta de CHA, creyar un Paisache Protechiu d’a Mar d’Aragón, ye una alternativa a lo coto de pesca “que suposa la privatización d’a pesca y que no apanya problemas derivaus d’a presencia de pescataires furtivos ni fa honra ta desenrollar-ie atras actividatz agricolas, esportivas….”, diz Rafael Lumbreras

Entre as razons que dan ta esfender ista figura ye a facilidat en a chestión, a guarencia de treballos destinaus t’o Paisache, ua chestión integral  d’o coto social, os camins, o control d’aloixes ilegals, …

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.