CHA demanda “solucions urchents” ta l’hespital de Balbastro

Bi ha biopsias pendients de fer. O chusticia d'Aragón ya denunció as listas d'aspera.

 

Nieves Ibeas y Joaquín Palacín (Foto: CHA)

Nieves Ibeas y Joaquín Palacín (Foto: CHA)

Bells representants de Chunta Aragonesista (CHA) han anunciau a intención que tien o partiu de presentar una moción ta mirar de solucionar antis con antis a situación de l’hespital de Balbastro.Seguntes denunció o Chusticia, en a zaguer anyada se i han triplicau as listas d’aspera en oftalmolochía y otorrinolaringolochía. En atras especialidats como ciruchía cheneral, dichestivo y traumatolochía s’han duplicau y en urolochía han puyau un 25%. Antimás bi ha más de mil biopsias que encara no son feitas, belunas d’ellas pendients dende abril.

Cuanto a iste afer, Nieves Ibeas, portavoz de Sanidat de CHA declaró que “garra gubierno tien o dreito a chugar con a vida d’as personas y a irresponsabilidat d’iste gubierno PP-PAR ye imperdonables, porque levamos masiadas anyadas demandando amilloras en iste hespital.” Joaquín Palacín, diputau y conceller de Monzón denunció a “hipocresía d’o Partiu Popular” qui, en l’anterior lechistatura, saliba t’a carrera denunciando a situación de l’hespital. Antimás creye que a solución no pasa por “empiorar os servicios ta dimpués privatizar-los.”

CHA ha anunciau una proposa endrezada t’o Gubierno d’Aragón, y os concellos y redoladas afectaus por l’hespital de Balbastro, que que faigan un estudio urchent y detallau sobre lo que amenista l’hespital y os suyos recursos y una “planificación plurianyal de inversions y recursos materials y humans que permita concarar as listas d’aspera.”

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.