CHA demanda una comisión d’investigación por as “colocacions a dido” en SARGA

Seguntes bellas informacions, o PAR podría haver feito servir Sodemasa ta dar treballo a la suya militancia

Nieves Ibeas, de CHA

Nieves Ibeas, de CHA

Chunta Aragonesista (CHA) demandará una comisión  d’investigación en as Cortes debant d’as zaguers noticias que denuncian que se podrían haber creyau puestos publicos de propio, con grans chornals, ta militants y cargos d’o Partiu Aragonés (PAR) en as antigas interpresas publicas Sirasa y Sodemasa, que fa poco se fusionoron ta formar SARGA, y que agora ye planteyando un ERE.

As noticias que’n fa referencia CHA son estadas publicadas en istos diyas por El Periodico de Aragón, a on que se charra d’a gran cantidat de cargos de l’antiga interpresa publica Sodemasa vinclaus a o PAR y de como, supuestament, “colocaban a dido” a muitos militants en as oficinas d’a interpresa. Mesmo se creyoron, seguntes El Periodico, puestos de propio, como lo d’a oficina de Calatayut, destinau a protecher un espacio natural que no existe. Iste mesmo meyo, asegura hue que “totz os partius politicos d’a comunidat conoixeban que as dos companyias [Sirasa y Sodemasa] se feban servir ta colocar a personas afins a determinadas siglas. Lo que agora aflora ye nomas o fruito d’as tensions cheneradas en a demba d’a negociación de l’ERE.”

“Si isto ye realment asinas, ye un escandalo, y mesmo más si nos metemos en a pelleta d’a chent que lo ye pasando mal, a qui continan demandando sacrificios entre que ha de desayunar-se con istas informacions”, ha afirmau a portavoz de CHA en as Cortes, Nieves Ibeas. “No podemos quedar-nos sin fer cosa, porque isto puet estar nomás a punta d’o iceberg: cal que totz os trapos puercos surtan t’a luz y que se asuman responsabilidatz politicas de  man d’os partius que haigan feito irregularidatz y de man de qui les n’han deixau y amparau.”

Ibeas ha sinyalau que “dende CHA no somos disposaus a consentir l’emplego partidista d’as institucions y l’Administración, ni que as personas que s’adedican a la chestión publica y a politica metan antis os suyos intreses privaus a los intreses chenerals que han d’esfender.”

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.