CHA, en contra de l’emplego d’o casco obligatorio ta ciclistas en a ciudat

Consideran que a mida reduciría l'emplego d'a bicicleta en Zaragoza. Amás proposan que as bicicletas puedan chirar en bells chiros reservaus t'o transporte publico

A bicicleta ya forma parte d’o paisache urbano de Zaragoza. Ye una cosa evident y que dende bellas formacions politicas d’a capital aragonesa quieren naturalizar a uellos de totz os ciudadanos. En busca d’ista zaguera meta, os representants municipals de Chunta Aragonesista (CHA) han solicitau a o Concello de Zaragoza que se revisen determinaus chiros en a ciudat que son permitius nomás ta autobuses y taxis pero que habrían de poder  prener-se tamién con a bicicleta. Un d’ells, o mas “evident” seguntes CHA ye situau en a Puerta d’o Carmen, a on solicitan que se pueda chirar dende Cesar Augusto t’o Paseu Pamplona.

Leticia Crespo, concellera de CHA, ha remerau que “en muitos puntos, y debant d’a carencia d’un ret completo de carrils bici dentro d’a ciudat, as bicicletas circulan por a calzada” y por ixo ye de recibo que se procedan a revisar os “cruces y chiros ta que se les permita realizar maniobras que tienen restrinchius os vehíclos privaus pero permitius ta taxis y autobuses”.  En previsión de posibles criticas, a propia Crespo ha deixau claro dende un primer momento que “no se tracta d’un tracto de favor” soque d’o feito de “adequar” o meyo de transporte a o trafico.

“Nos trobamos casos en os que o propio concello dificulta a circulación”, ha asegurau CHA antes de demandar a o Consistorio d’a capital que sía o primer en facilitar os desplazamientos en Zaragoza.

“A vueltas” con o casco

Atro d’os puntos de preocupación que han expresau dende ista formación tien a veyer con a regulación, a ran estatal, de l’emplego d’o casco en a ciudat. A reforma d’o Codigo de Circulación que planteya o Gubierno Central afectaría de pleno a beluns d’os puntos a os que en Zaragoza se plegó por consenso, caso de l’emplego d’o casco dentro d’a ciudat. En iste sentiu, CHA ha solicitau a Juan Alberto Belloch, alcalde de Zaragoza, que esfienda os puntos alcordaus y demande que l’emplego d’o casco en vías urbanas no sía obligatorio y que sía una recomendación como estableixe l’articlo 36 d’a Ordenanza municipal de piatons y ciclistas.

Entienden que, en caso contrario, se frenará l’emplego d’a bicicleta y por ixo habría d’estar un punto opcional ta cada usuario. Amás, s’han preguntau como se podría regular ista norma con bells servicios d’a ciudat como, por eixemplo, o BiZi.

Fuent: http://www.aragon2.com/n-20078-3-CHA_contra_casco_obligatorio_para_ciclistas_ciudad

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.