CHA exiche a o rei que abdique y renuncie a los suyos dreitos dinasticos

Prencipian una campanya de mocions en concellos, comarcas y diputacions

Jose Luis Soro, acompanyau d'atros cargos de CHA (Foto: CHA)

Jose Luis Soro, acompanyau d’atros cargos de CHA (Foto: CHA)

Chunta Aragonesista (CHA) ha demandau a lo rei d’Espanya, Juan Carlos de Borbón, que “abdique d’o suyo cargo de Chefe d’Estau y que renuncie a totz os dreitos dinasticos que podesen corresponder-le a ell y a toda la suya descendencia”.

Dende iste partiu han anunciau que encetarán una campanya de mocions en concellos comarcas y diputacions ta demandar l’abdicación y que presentarán en as Cortes espanyolas una iniciativa ta prencipiar una reforma constitucional que proclame a Republica Federal y convierta o Senau en “una cambra de representación territorial que reflexe la plurinacionalidat de l’Estau”.

A primer moción ya se ha rechistrau en o Concello de Zaragoza. CHA ha remerau que “Alfonso XIII se’n fue y plegó a II Republica a traviés d’unas eleccions municipals por lo que planteyar o debat en as corporacions locals tien muita carga simbolica”.

Jose Luis Soro, president de CHA, ha declarau que levan “decadas demandando que se sacase a monarquía en suposar un repui, chunto con o Concordato con a Ilesia catolica, d’o franquismo”, y adhibe que “agora ye chupida de corrupción por lo que cal que prencipie un proceso democratico que enante enta una Repuclia Federal a on que se respete a pluralidat estatal y a on que Comunidatz como Aragón sigan comodas”.

Ta Soro “a monarquía ye una institución inutil, fosca y antidemocratica ya que ye alazetada en os privilechios y a desigualdat. “Somos ciudadans, no pas subditos de dengún, por lo que no i culle en iste marco cheneral una institución que s’eslampa d’o control de Hicienda u que os suyos representants no sigan esleixius por o pueblo”, ha declarau.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.