CHA s’amuestra preocupada por l’estau d’a torre de Mediano

A torre d'a ilesia d'o lugar de Mediano, baixo as auguas d'o entibo d'o mesmo nombre, ye en periglo por o suyo estau.

A ilesia de Mediano, con l'augua baixa (Foto: Wikipedia)

A ilesia de Mediano, con l’augua baixa (Foto: Wikipedia)

Chunta Aragonesista s’ha amostrau iste miercols preocupada por l’estau d’a torre d’a Ilesia de Mediano, Bien Catalogau de Patrimonio Cultural Aragonés y con “evidents y grieus esferras”. A colla parlamentaria d’iste partiu presentó fa poco una pregunta ta saber si bi heba prevista bella actuación ta refirmar y restaurar a torre, ta lo que han recibiu a respuesta, de man d’a consellera de Cultura Dolores Serrat, de que “no ye previsto intervenir-ie en un futuro amanau“.

CHA ha ubierto bellas linias d’actuación ta mirar-se d’esfender iste patrimonio y presentará en o Pleno Comarcal de Sobrarbe una moción a on que se demandan actuacions de l’administración, “con l’aduya y financiación d’Endesa y la CHE” a qui consideran tamién responsables. Antimás, en o Congreso Espanyol, a traviés d’o suyo diputau Chesús Yuste, tamién demandarán o compromís d’a CHE y Endesa, en estar as entidatz que chestionan a central hidroelectrica de Mediano.

Como ha remerau José Ramón Ceresuela, president de CHA en o Sobrarbe, “en 1969, rematoron as obras d’a central hidroelectrica de Mediano y l’entibo lo cubrió tot fueras d’ista torre que ha esdeveniu un referent sinyaler d’a identidat de Sobrarbe d’a resistencia a la espoblación d’o nuestro territorio, sinyal d’a nuestra memoria historica y d’o sentimiento colectivo d’asperanza en un futuro millor, dimpués d’o sufrir que mientres decada y dica hue, traye la irracional politica hidraulica, y que no bi haiga restitucions t’os territorios que sufrioron ista politica colonialista.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.