CHA s’oposa a la construcción d’un entibo en o río Alcherez

Creyen que "a cuenca d'o Guadalope ya ye hiperregulada" y que ista actuación "chenerará más perchuicios que beneficios".

L'Alcherez en pasando por Zurita (Foto: Wikipedia)

L’Alcherez en pasando por Zurita (Foto: Wikipedia)

O Consello Nazional de CHA alcordó ista semana o suyo refús t’a construcción d’un entibo en o río Alcherez (en catalán y castellano, Bergantes), afluent d’o Guadalope, dimpués de que a Confedereación Hidrografica de l’Ebro anunciase ista obra. Ángel Hernández, vicesecretario de CHA en o Baixo Aragón ha remerau que “a cuenca d’o Guadalope ya ye hiperregulada y que o Bergantes ye un río con arrienda de chent que lo visita y que lo fa servir como zona de banyo y ta pasar-ie o rato y que destaca por a polideza d’a redolada”.

Ta Hernández, sería un entibo más en una d’as redoladas más hiperreguladas d’a Cuenca de l’Ebro”, y nombra, entre atras muita, as obras de Santolea, Calanda, a Estanca u Casp. “Ista obra no va a trayer más beneficios que prechuicios”, diz o portavoz de CHA.

Dende iste partiu tamién han quiesto remerar que cal cumplir con a Directiva Marco de l’Augua y que “con obras como ista no se conseguirá”. O cabal ecolochico d’o río tampoco no ye establiu, lo que ta CHA, ye parti d’as practicas cutianas d’a CHE, qui dicen que “fa las cosas de revés”, pensando primer en “sacar auguas ta dubdosos reganos, estricallar o río, y dimpués pensar en o que sobrar ta tornar-lo-ie, plegando muitas vegadas mesmo a deixar caucez de tot ixutos de verano”

L’argumento emplegau por a CHE, que esfiende a obra ta guarenciar mayor seguridat t’os lugars de Calanda y Alcanyiz, no ye creyible t’a CHA. “Si realment ye ta ixo, nomás caldría apanyar o entibo de Calanda y no deixar que s’impla a lo maximo. Auguas abaixo ya bi ha prous entibos a on que replegar augua”, diz Hernández. O partiu ye agora analizando posibles iniciativas parlamentarias sobre iste afer, tanto en o parlamento aragonés como en l’espanyol.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.