CHA vei irresponsabilidat en a chestión d’Arturo Aliaga cuanto a Walqa

Han demandau a comparecencia en as Cortes de Arturo Aliaga ta charrar-ne

Walqa (Foto: D.Ch.A.)

Walqa (Foto: D.Ch.A.)

A colla parlamentaria de CHA ha demandau a comparecencia d’o Conseller de Industria y Innovación d’o Gubierno d’Aragón ta que informe d’a situación d’o Parque Tecnolochico Walqa. Iste partiu culpa tanto a lo concello de Uesca como a la D.Ch.A. d’una chestión d’o parque que califican de “irresponsable”.

T’o portavoz municipal en o concello de Uesca, Luis Gallego “l’equipo de gubierno municipal no fa as suyas funcions en Walqa deixando-la en mans d’a D.Ch.A., lo que no sería masiau grieu si ista estase responsable“. Ta Gallego, “l’alcaldesa de Uesca contrimuestra a suya falta de compromís con creyar emplego y deixa a Walqa en mans d’o PAR, qui contrimuestra una vegada más a suya incompetencia a l’hora de chestionar, ya que o conseller Aliaga se comporta con o suyo chuguete como un nino que preta a plorar y s’encarranya quan no se le da la razón”.

O diputau de CHA Joaquín Palacín crei que ye “preocupant a situación de Walqa, un parque tecnolochico de baixo ran, que no ye foco de tecnolochía, ni t’atrayer I+D+I, a on que no se creyan sinerchias de nuevo desembolique, pero que ye foco de precariedat ta treballadors y interpresas”.

Ta Palacín ye “penible y verguenyoso que un Conseller d’Industria y Innovación convide a las interpresas criticas a marchar-ne, quan por desgracia bi ha interpresas instaladas en Walqa que son marchando-ne debant d’a falta d’infraestructuras, de que no bi ha prochección internacional, ni colaboración con a Universidat, y de que se incumplan as promesas que les fació lo propio conseller”. “Talment deba estar o propio conseller qui dimita y se’n vaiga por o bien d’a industria y l’emplego en Aragón”, ha adhibiu”.

Ta rematar Palacín ha remerau os 100 treballadors forachitaus o pasau viernes lo que, seguntes o diputau “no pareixe preocupar a lo Conseller d’Industria” y que o suyo gubierno ha baixau en dos anyadas un 70% o presupuesto en I+D+I en Aragón, quan as nuevas tecnolochías habrían d’estar un pilar ta salir d’a crisi y creyar emplego”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.