CHA y IU critican as declaracions de Ferrando sobre a lei de no luengas

CHA menaza con deixar a comisión a on que se debat a lei y IU demanda a dimisión d'a diputada d'o PP

Reunión d'a ponencia (Foto: Cortes d'Aragón)

Reunión d’a ponencia (Foto: Cortes d’Aragón)

As reaccions t’as zaguers parolas de María José Ferrando, diputada d’o PP, sobre a lei de no luengas que se ye tramitando en as Cortes d’Aragón, no se han feito asperar guaire y tanto CHA como IU han protestau por o conteniu d’o comunicau que fació publico a Coordinadora d’a Ponencia d’a Lei de no-Luengas.

En o comunicau, a diputada d’o PP, qui leva a portavocía d’Educación d’a suya Colla Parlamentaria, denuncio “o malfurrie que suposaría acceptar as esmiendas t’a Lei de Luengas presentadas por as collas de PSOE, CHA y IU.” Sin aclarir de do salen as cifras, Ferrando dició que “acceptar-las suposaría, por eixemplo, haber d’achustar 1.400 traductors t’o Gubierno d’Aragón, Diputacions, Comarcas y Concellos con un coste estimau de 24 millons d’euros”. Seguntes istas cuentas, bi habría quasi dos traductors por cada municipio aragonés. En total, la diputada fa una cuenta de 30 millons d’euros anyals contando a rotulación d’edificios publicos y a sinyalización  “en catalán o fabla (sic)” de municipios, carreteras, ermitas, clamors, etc…” u d’imprentar por triplicau toda la documentación oficial que salga d’as institucions”.

A diputada continó esfendendo que a Lei de no luengas que han levau t’as Cortes o PP y o PAR, y que sustituyiría a la que bi ha en vigor y que no ha plegau a desembolicar-se mica, “quier protecher y meter en valor as nuestras luengas“, encara que no las nombra, “sin coaccionar ni imposar y prou que sin fomentar o malfuerrie”.

A colla parlamentaria de IU, en reacción, ha demandau a dimisión de María José Ferrando por istas parolas y no se participará en os treballos d’a Ponencia entre que ella i contine representando a o PP y coordinando-la. IU califica de “tendenciosas y metirosas” as declaracions y de una falta de respeto ta qui charra atra luenga diferent d’o castellano en Aragón. Adolfo Barrena, portavoz de IU, esfiende que as emiendas d’a formación no miran de puyar o gasto. “Argumentan coste economico, costes de tot exacheraus a esprés por o PP, ta chustificar que no cumplen o mandau constitucional y de l’articlo 7 d’o nuestro Estatuto d’Autonomía y lo fa, despreciando antimás, a qui tienen dreito a fer servir a suya luenga propia y prebando de desacreditar o treballo d’a oposición”.

Barrena se ha preguntau si o PAR “secunda iste sectarismo” y “Cómo puet protecher-se una luenga quan en a Lei que se suposa que la proteche nian se le nombra?”. Acusa a los dos partius que esfienden ista lei de tener un “fundo y sectario sentimiento espanyolista y anticatalanista“. “Qui asinas desprecia los dreitos ciudadans”, contina, “queda invalidada ta coordinar a ponencia parlamentaria sobre a Lei de Luengas y ha de dimitir”.

Dende CHA, qui han calificau as declaracions como “un ensayau y premeditau fascal de mentiras” , han menazau con marchar d’a Ponencia d’a reforma d’a Lei de Luengas si contina coordinandola María José Fernando. Nieves Ibeas la ha acusau de “fer desprecio d’os fablans de catalán y d’aragonés” y de “no querer debatir”. A portavoz de CHA ha dito que “os datos son absurdos y fruito de “calculos manipoliaus y inverosimils” y ha remerau que o PP ye negando a realidat trilingüe d’Aragón. Ta Ibeas, ista maniobra responde a una estretechia ta “pasar o ruello” antis con antis y aprebar a lei de no luengas sin debatir-ne mica.

 

 

6 Rispuestas a CHA y IU critican as declaracions de Ferrando sobre a lei de no luengas

  1. Que se puet asperar d’ista chent… la crisi les ne viene de puta mai ta chustificar tot

  2. Pingback: Cultura da una subvención ta un libro en una luenga que no existe | AraInfo | Achencia de Noticias d´Aragón

  3. Yo la clamaría “lei antiluengas”, directament, porque o que pretende ye preciament enrestir cuentra las luengas y lechislar a suya inexistencia.

  4. Tenen montat tot un entramat d’asociacions culturals que donen por, en serio, mireu la FACAO, estar clar que necesitem una segona transició. Lo mes bo de tot es que he conegut molta txen de esquerres que defensaen lo Timó i tots aquestos i que quan els hi he explicat be el que són han obert els ulls i han renegat de tots els seus dogmes merdosos.

  5. Pingback: Cultura da una subvención ta un libro en aragonés oriental - La Franja

  6. Pingback: S’apreba a lei de no luengas | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.