Chaca, Zaragoza, Uesca y Teruel refirman a os estudiants valencians

O 29 de febrero ye convocada una chornada de luita estudiantil

Dende Pza. Sant Francisco, os concentraus baixan enta o centro de Zaragoza

Dende Pza. Sant Francisco, os concentraus baixan enta o centro de Zaragoza (Foto: Serchio Tella)

As concentracions de refirme a os estudiants valencians en o país aplegoron ahiere a muitos estudiants y no estudiants ta amostrar, amás, o refús a la violencia policial istos diyas. En Zaragoza, convocaus por os sendicatos estudiantils, centenars de personas s’achuntoron en a Plaza Sant Francisco d’a capital ta baixar dimpués enta o centro, a siede d’o PP y a Delegación d’o gubierno espanyol en Aragón.

A concentración remató con a lectura d’un comunicau contra la violencia, por l’amostranza publica y a dimisión d’a delegada d’o gubierno espanyol en Valencia, Paula Sánchez de León. Amás, se remeró a convocatoria d’una vada estudiantil ta o venient 29. En a marcha posterior, una vegada rematau l’acto, i habió bells intes de tensión debant d’a siede d’o PP y bella entidat bancaria. A protesta remató en a Plaza’l Pilar, an que un gran cordón policial protecheba a Delegación d’o gubierno espanyol.

Tamién en Chaca, bellas 50 presonas han quiesto refirmar a os estudiants de l’instituto Lluis Vives valencián. Amás d’una concentración, han feito una Asambleya contra la violencia policial y o retalle de dreitos socials. Han refirmau a convocatoria d’o diya 29, y mesmo han amostrau a suya intinción de movilizar-se contra atras questions como o recreiximiento de l’entibo de Yesa.

En Uesca, arredol de 300 presonas s’han concentrau debant d’a Subdelegación d’o gubierno espanyol en Uesca. Os concentraus han protestau contra as actuacions policials en Valencia y han desichiu responsabilidatz politicas. Dende astí, os concentraus han marchau enta Plaza Navarra, an que s’ha feito una asambleya ubierta. Amás d’a situgación en Valencia, s’han remerau tamién atros casos más amanaus, como o de Borcha, an que o centro escolar presenta deficiencias grieus.

En Teruel convocaus por Purna, CNT y l’Asambleya d’Estudiants, amán de 200 personas s’han concentrau a las puertas d’a Facultat de Sciencias Socials y Humanas. Dimpués de leyer o manifiesto han decidiu de baixar en manifestación dica a Subdelegación d’o gubierno espanyol en a plaza Sant Chuan, por o que han tallau o carril d’a Carretera d’Alcanyiz. Dimpués d’una pancarta que meteba “En esfensa de lo publico” s’han chilau consignas como “presupuestos policials ta escuelas y hespitals”, “si se fan os suecos nos feremos os griegos”, “yo tamién soi l’enemigo” u “ya ye prou d’abuso policial”. .

Fuent: http://arainfo.org/2012/02/masiva-respuesta-estudiantil-en-aragon-a-la-represion-policial-de-valencia/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.