Charata prencipia iste sabado a localización y exhumación de dos vecinas d’Uncastiello asesinadas en 1936 por o faixismo

Iste sabado 9 de noviembre ye previsto que prencipien os treballos pa la localización y exhumación d'os calavres de Rosario y Lourdes Malón Pueyo, asesinadas en a Guerra Civil

Rosario y Lourdes Malón Pueyo, asesinadas o día 20 d'agosto de 1936 en o parache d'as Penyas de Santo Domingo (Longars, Cinco Villas)

Rosario y Lourdes Malón Pueyo, asesinadas o día 20 d’agosto de 1936 en o parache d’as Penyas de Santo Domingo (Longars, Cinco Villas)

L’Asociación Charata pa la Recuperación d’a Memoria Historica, fendo-se cargo d’a solicitut d’a familia Malón Mendi y dimpués de quantos anyos d’investigación sobre iste episodio muit conoixiu en toda a comarca aragonesa d’as Cinco Villas, tienen previsto d’encetar -iste sabado 9 de noviembre– os treballos arqueolochicos de localización y exhumación d’as vecinas d’Uncastiello Rosario y Lourdes Malón Pueyo, asasinadas o día 20 d’agosto de 1936 en o parache d’as Penyas de Santo Domingo (Longars), a mas de 1500 metros d’altaria, y do se troban encara enronadas seguntes testimonios orals recullius por miembros de Charata.

D’ista traza, l’Asociación Charata pretende de contribuir a la reparación moral y a fer chusticia a istas dos victimas, localizando y entregando os suyos restos a os suyos familiars, qui tant solament deseyan de recuperar os restos d’os suyos sers quiestos ta dar-les una sepultura digna y asinas poder mitigar, a lo menos en parte, a dolor d’una familia que estió practicament exterminada en agosto de 1936.

L’asociación sinyala que conta con totz os permisos necesarios, “pero 77 anyos dimpués d’istas muertes violentas o Estau sigue desatendendo a os suyos ciudadanos y a las victimas d’un cruento golpe d’estau”. En istos dos zaguers anyos s’han eliminau as subvencions estatals y aragonesas, tot y que mils de cuerpos humanos encara chacen “desapareixius” en cients de fuesas comunas repartidas por a cheografía d’Aragón. “A falta d’aduyas publicas fa que quede en cosa a denominada Lei d’a Memoria Historica (Lei 52/2007)”, denuncia l’asociación.

Dende Charata agradeixen “a vuestra colaboración contribuindo a la difusión d’iste prochecto de todas as trazas posibles (cuentas de correu electronico, blogs, retz socials, prensa, boca a boca,…) pa tractar de plegar lo mas luen y a mayor numero de chent como sía posible”. Amás, si belún deseya de colaborar economicament en iste nuevo prochecto puede fer o suyo donativo en a cuenta bancaria de l’Asociación Charata: 2085 0871 61 0330051596.

“Continamos un camín que hemos encetau recientment en colaboración con l’Asociación por a Recuperación y Investigación Contra l’Ixubliu (ARICO), con a exhumación en o fosal municipal de Sos“, recuerdan as personas de Charata. Actualment encara son pendients de l’informe antropolochico pa poder confirmar que os restos humanos exhumaus corresponden a Saturnina Arbea Villacampa, una d’as dos personas que buscaban.

A historia de Rosario y Lourdes. Recuperando a memoria

Dimpués d’o sozmetimiento por parte d’os militars sublevaus d’as localidatz d’a comarca d’as Cinco Villas, grupos de civils desarmaus escaporon d’os suyos lugars acubillando-se entre bell tiempo en os monts proximos, antes d’intentar a fuyida ent’a zona de Uesca controlada por a Republica u t’o Estau francés. Un d’istos grupos, formau por si fa u no fa una vintena de vecins d’Uncastiello, s’amagó en as Penyas de Santo Domingo (1524 m.), en a muga d’o termin municipal de Longars.

O periodico El Noticiero d’o día 5 de setiembre de 1936 narra cómo s’organizó una batida formada por falanchistas de diversos lugars, Urriés, Navardún, Isuerre, Lobera y Longars) a o mando de Francisco Ripalda Roncalés, tenient retirau d’a Guardia Civil y chefe de Falange en Urriés. A las cinco d’o maitín d’o 20 d’agosto de 1936 istas fuerzas arriboron a la cima d’as Penyas de Santo Domingo. Os allí concentraus preboron de fuyir, por o que os falanchistas prencipioron a disparar causando tres muertos, un choven de 24 anyos y dos mesachas de 18 a 20 anyos.

As chirmanas Rosario Malón Pueyo (23 anyos) y María Lourdes Malón Pueyo (18 anyos) estioron asasinadas quan feban un poder por escapar d’a espelunga do yeran refuchiadas chunto a su pai Francisco Malón Gil y o suyo chirmán Mariano Malón Pueyo. A inscripción de todas dos defuncions en o Rechistro Civil d’Uncastiello se fació en 1952, do se replega a suya muerte a las 6.00 horas d’o día 19 d’agosto de 1936 en o termin municipal de Longars a “conseqüencia d’a guerra”, pero lochicament o rechimen franquista empachó a descripción d’os verdaders escayecimientos.

A mai, Francisca Pueyo Prat, heba estau afusilada uns días antes en Luesia chunto a atros vecins d’Uncastiello, mientres que su pai Francisco Malón Gil murió muit poco tiempo dimpués escamallau y de dolor dimpués d’haber asistiu a os asesinatos d’a suya muller en Luesia y d’as suyas dos fillas en Santo Domingo. L’unico supervivient d’a familia, Mariano Malón Pueyo alcanzó a zona de Uesca, leyal a la Republica, y combatió dica o final d’a Guerra Civil en a 127 Brigada Mixta, conoixida como a “Roya y Negra”, estando posteriorment condenau a un anyo de prisión y a complir servicio entre tres anyos en un Batallón de Soldaus Treballadors Penaus. Finalment s’establió como colono en Pinsoro (Exeya d’os Caballers).

Por o que fa a o tercer d’os fallecius en Santo Domingo, a suya muerte no estió rechistrada, por o que bi ha ciertas dubdas sobre a suya identificación, encara que seguntes os zaguers datos orals recabaus podría tractar-se de Maximo Estabén Beguería.

Asociación Charata d’Uncastiello. Contra o silencio imposau

L’Asociación Charata pa la Recuperación d’a Memoria Historica d’Uncastiello naixe a prencipios de l’anyo 2007 “por a necesidat de rescatar d’o silencio y de l’ixubliu a tantas y tantas personas victimas anonimas d’a represión exercida entre o golpe d’estau d’o 18 de chulio de 1936 y a posterior dictadura franquista” en Uncastiello y en a comarca d’as Cinco Villas.

En iste sentiu, entre istos anyos l’asociación ha realizau diversas actividatz culturals de caracter divulgativo como exposicions, charradas, conferencias, homenaches, dignificación de fuesas comuns en os fosals municipals d’Uncastiello y O Frago. O 24 de chulio de 2010, con l’asistencia d’unas 600 personas, se celebró en o Fosal Municipal d’Uncastiello un acto en memoria d’os “uncastillers asasinaus por defender a Republica, a Libertat y a Chusticia” con a devantadera d’un Monumento-Memorial, do s’inscribe una relación de 154 victimas (144 d’ells vecins y vecinas d’Uncastiello) pa honrar “a memoria de qui estioron asasinaus por a represión franquista”.

Tamién empecipioron un prochecto d’investigación historica denominau “Uncastiello (1930-1945): Segunda Republica, Guerra Civil y Postguerra” coordinau por l’arqueologo y historiador Francisco Javier Ruiz Ruiz, que tamién s’estendilla puntualment a atros lugars de l’entorno d’as Altas Cinco Villas. Pa ixo s’han centrau en a consulta documental en fichers historicos y hemerotecas, amás de fer servir as nuevas ferramientas que proporciona internet como as denominadas hemerotecas dichitals, y en a replegada de testimonios orals y de documentos familiars como fotografías. Gracias a istas investigacions han publicau diversos articlos divulgativos y editau tres libros: ‘Uncastiello, mullers d’o 36: un retrato, una historia, una vida’ (2008), ‘As voces d’o silencio’ (2009) y ‘Una vida baixo tres banderas. Memorias de Marino Combalía Pérez. Uncastiello, 1918 – Río de Janeiro, 2000′ (2011). Y asperan en un futuro de poder editar un libro que replegue os resultaus finals d’as suyas investigacions historicas.

Unatra d’as linias d’actuación que Charata se proposó en l’anyo 2007 estió a investigación, busca y localización de personas desapareixidas a resultas de peticions particulars de familiars, asinas como l’asesoramiento y l’emparo a las familias intresadas en recuperar os restos d’os suyos familiars asasinaus y que remaneixen enronaus en fuesas comuns sin identificar. Y en o suyo caso, a exhumación d’os restos por profesionals qualificaus (arqueologos, antropologos-forenses,…) pa proceder a o suyo posterior treslau y recibir una sepultura digna.

Entre os anyos 2012-2013 colaboran con l’Asociación por a Recuperación y Investigación Contra l’Ixubliu (ARICO) en a busca y documentación de fuesas comuns de desapareixius mientres a Guerra Civil en os municipios cincovilleses d’Os Pintanos, Luesia y Sos a resultas de solicitutz de familiars que han plegau a todas dos asociacions.

Fuent: http://arainfo.org/2013/11/charata-inicia-este-sabado-la-localizacion-y-exhumacion-de-dos-vecinas-de-uncastiello-asesinadas-en-1936-por-el-fascismo/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.