Chávez torna a patir cancer y nombra posible sucesor

Chávez tornará a operar-se en Cuba d'o mal d'alcance d'a pelvis que torna a patir. En caso de quedar inhabilitau, ha designau como sucesor a Nicolás Maduro, o suyo vicepresident

Foto: Wikimedia Commons

O president venezolano Hugo Chávez habió de tornar ahiere ta Cuba a sozmeter-se a una nueva intervención quirurchica urchent dimpués de que se le trobasen nuevas celulas cancerichenas en a pelvis. Ya feba tres semanas que o president venezolano no apareixeba en publico y s’especulaba sobre o suyo verdadero estau de salut. O mandatario latinoamericano tornó de Cuba a on se fació unas prebas medicas t’a suya malotía, conoixendo os resultaus iste pasau viernes. Chávez tornó ta Venezuela ta dar a conoixer a suya decisión d’operar-se en os venients diyas y demandar permiso a la Asamblea Nacional venezolana ta ausentar-se d’o país.

Chávez ya s’ha sozmeso dende chunio de 2011, quan se le detectó o mal d’alcance en a pelvis, a tres operacions quirurchicas, quatro ciclos de quimioterapia y seis de radioterapia en L’Habana, o que ocasionó as criticas d’a oposición por no tractar-se en Venezuela y “gubernar por Twitter”.

Chávez, en un mensache a la población, ha demandau a o pueblo venezolano que, en caso de quedar inhabilitau fisicament t’o cargo, trigue como president d’a Republica Bolivariana de Venezuela a Nicolás Maduro, vicepresident y ministro de Relacions Exteriors actual. Ye a primer vegada que o lider bolivariano nombra a un sucesor. Chávez ha considerau a designación de Maduro como “irrevocable”. En l’hipotetico scenario de quedar inhabilitau Chávez, habrían de tornar a convocar-se eleccions presidencials, dos meses dimpués d’a pasada reelección d’Hugo Chávez como president y a un mes d’a suya toma de posesión en o cargo, o 10 de chinero.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.