China fa fuera barcos chaponeses d’a zona d’as islas en disputa

Contina a tensión entre China y Chapón por a sobiranía d'as Islas Senkaku (Diaoyu). Bells barcos chaponeses estioron forachitaus por patrulleras chinas

Quatro barcos de patrulla chinos facioron fuera o martes a bells barcos chaponeses, que navegaban por auguas amán d’as islas Diaoyu que Pekín y Tokio se disputan. As fuerzas chinas gritoron a os barcos nipons por radio y les facioron albandonar a zona dimpués de prener as fotos que contrimuestran a infracción d’ingresar en auguas territorials de China.

Un representant d’a Guardia Costera chaponesa no confirmó que as embarcacions d’iste país haigan deixau as auguas disputadas baixo a presión de China, pero ha indicau que os barcos de totz dos países demandaban a l’atra parte que albandonase a zona, a traviés de sinyals luminosas especials.

Actitut “de raso chustificada”

O Ministerio d’Afers exteriors chino, por a suya parte, ha sinyalau hue, que as accions d’as suyas naus patrulleras estioron “de raso chustificadas”. Ye a primer vegada dende o recrudeiximiento d’o conflicto en setiembre, que os barcos de patrulla chinos preban d’exercer l’autoridat que, seguntes o Gubierno de Pekín, o país tien sobre as islas.

O viceministro chino d’Afers exteriors, Zhang Zhijun, heba informau o pasau viernes en Chapón que “a unica opción de Pekín” yera prener “midas mas fuertes” si Tokio manteneba a suya actual posición en o conflicto por a sobiranía de l’archipielago. Chapón y China se disputan as cinco islas Senkaku (Diaoyu) dende fa decenios, pero o conflicto s’agravó en setiembre de 2012 quan o Gubierno chaponés mercó tres d’as cinco islas en qüestión, que se trobaban en mans privadas niponas.

Ista “nacionalización” estió percibida por Pekín cómo ilegal y invalida. Mils de chinos y chaponeses salioron t’as carreras a manifestar-se por o pleito territorial entre os suyos países. Bells analistas admiten que mesmo i hai risque de que o conflicto se convierta en violencia y enfrontinamiento ubierto.

Fuent: http://noticies.sirius.cat/2012/10/xina-expulsa-vaixells-japonesos-de-la.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.