Chornada Intercultural y Muestra Agroecolochica de Zaragoza

Bi habrá actividatz mientres tot lo sabado

10 febrero, 2012 | Sociedat, Zaragoza | Autor: Arredol | Tweet

Iste sabado en Zaragoza se celebrarán unas chornadas interculturals que prebarán d’unir as diferents culturas a traviés de la virolla y l’arte. As chornadas prencipiarán de maitins en a Plaza Mayor de Sant Chusé y de tardis continarán en a Casa Amparo d’a carrera Predicadors.

De maitins se ferá a muestra agroecolochica que por un regular se fa en a Plaza Sinués. En ista ocasions se’n va t’o vico de Sant Chusé ta ‘dar protagonismo a atros vicos’ seguntes a organización. Se i ferá tamién un mural y una tastada de virolla intercultural con mosica de ‘Os Chufladors’

De tardes y ya en o Gancho, bi habrá un taller de danza africana feito por Huguette Sidone de l’Asociación Endanza, titeres de l’artista cubana Yanet Capetillo titulaus “La Revuelta de los pájaros” y l’actuación mosical de una colla folklorica rumana, y d’os zaragozanos Roïter.

As chornadas son organizadas por CERAI, coordinadas por Artix y bi colaboran o PICH, l’aAsociación de Vecins de Sant Chusé, a Biblioteca Rey del Corral y Casa Amparo.