Chornadas practicas sobre bilingüismo en o CEIP El Espartidero de Santa Isabel

L'actividat denunciará o nuevo modelo de bilingüismo planteyau por o gubierno.

Protesta d'o CEIP El Espartidero (Foto: Marea Verda)

Protesta d’o CEIP El Espartidero (Foto: Marea Verda)

En o Colechio Publico de Infantil y Primaria “El Espartidero”, actualment bilingüe en francés, sito en o zaragozano vico de Santa Isabel, se va  a fer una chornada reivindicativa iste miercols 13. As actividatz que se i ferán son aintro d’a chornada de luita que se ferá ixe diya en tot Aragón en contra d’o PIBLEA, a orden que preba de regular o nuevo modelo de bilingüismo en Aragón y que a Plataforma Bilingüe d’Aragón, entre atras asociacions y colectivos, considera una “seria enrestida contra a Escuela Publica y o suyo esdevenider”.

Entre as actividatz que se ferán de tardes, bi ha tallers que ha presto o profesorau d’o centro t‘amostrar o funcionamiento actual d’o modelo de bilingüismo. Ta ixo bellas profesoras d’o centro ferán clases de infantil y de primaria en francés t’os pais y mais que quieran viyer de primer man como se treballa actualment en clase en os centros bilingües.

“Entendemos que ista traza practica d’amostrar como funciona l’actual modelo bilingüe ye muito más eficaz y atractiva que una explicación teorica sobre o tema, y asperamos asinas que os pais y mais se faigan una ideya obchetiva d’a esferencia entre lo que tenemos agora y lo que ufre o PIBLEA” sinyalan dende a Plataforma Bilingüe.

Dimpués d’os tallers practicos s’ubrirá una charrada debat, ta rematar con una cena en o colechio entre toda la comunidat educativa.

 

Fuent: http://arainfo.org/2013/03/jornadas-practicas-sobre-bilinguismo-en-el-ceip-el-espartidero-de-santa-isabel/

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.