Chornadas reivindicativas d’os centros de tiempo libre de Zaragoza

Se han programau arrienda actividatz arredol d'o diya universal d'o nino

17 noviembre, 2011 | Sociedat, Zaragoza | Autor: Arredol | Tweet

Gusantina ye una d'as entidatz organizaderas

Quatre centros de tiempo libre d’a ciudat de Zaragoza s’han organizau y coordinau ta programar toda mena d’actividatz mientres istas semanas. Lo fan con a enchaquia d’a celebración, o venient domingo 20 d’o Diya Universal d’o Nino.

Os quatre centros –El Trébol, Gusantina, Os Mesaches y Pandora– fan as actividatz con un caracter reivindicativo y convidan a tot qui quiera a amanar-se-ie y participar. As actividatz prencipioron o miercols 16 y continarán dica o domingo 27. O programa ye:

Vico de l’ACTUR: Os Mesaches organiza una gymkana por os dreitos d’o nino. Miercols 16 y chueves 17 de 17:00 a 20:00 en o solar d’a carrera Octavio Paz.

Vico d’a Madalena: Gusantina ferá o pasacarreras «Charra-me que t’ascuito» y una manifestación ciudadana con borina incluyida por o dreito d’a catrinalla a que les ascuiten. Chueves 17 de 17:00 a 19:00 dende a Plaza Asso dica a Plaza Sant Pietro Nolasco.

Vico de Torrero – A Paz: L’asociación El Trébol ferá un acto boriner por os dreitos d’o nino o domingo 27 de 11:00 a 14:00 en a Plaza d’as Canteras.

Vico de Sant Chusé / O Rabalet: Asociación Pandora ferá un acto ludico o viernes 18 a las 19:30 en a Carrera Terrazas de Cuellar numer 2, debant d’a suya siede.

O diya universal d’o nino se celebra totz os 20 de noviembre, remerando a Declaración d’os Dreitos d’o Nino en 1959.