Chudgan a un policía local de Teruel por menazar con foter un batán a un immigrant colombiano

Atro policía local gravó as menazas d'o suyo superior. O caso salió en o programa de La Sexta "El Intermedio"

Iste martes se realizó a segunda chornada en a instrucción d’o chuicio contra un policía local de Teruel por menazar en comisaría a un hombre d’orichen colombiano. Seguntes amuestra un vidio, l’achent procesau menaza a o migrant con “levar-lo t’o mont y foter-le un batán“.

As imachens, espardidas iste mierques por o programa de La Sexta El Intermedio, fuoron gravadas a amagatons por atro companyero de l’achent farto d’as presuntas situacions d’abuso a las que o suyo superior sozmeteba de traza habitual a la población migrant.

Entre atras cosas, o policía local diz: “Allí no sé cómo serán as cosas pero yo no te voi a levar ta comisaría ni ta garchola a que te den de minchar de gufanya, aquí a la chent que da por culo me la levo t’o mont. Te cayen os lapos como pans y allí te quedas, t’apanyas. U sía, a proxima vegada que nos clamen por a tuya culpa, te lo churo, te lo churo, te levo ta mitat d’o mont”. L’imputau ha asegurau en a suya esfensa debant d’o chuez que fació servir ixas expresions sin intención de menaza.

Os feitos escayeixioron o pasau mes de mayo, quan a propietaria d’una tabierna clamó a la Policía Local porque un client se negaba a pagar a consumición. Una patrulla policial se personó en o establimiento y l’achent, que posteriorment presentaría a denuncia, acompanyó a l’hombre ta un caixero automatico ta que quitase diners y pagase a suya bebida.

A policía lo tresladó dimpués ta comisaría t’a suya identificación y le advirtioron que no tornase t’a tabierna, pero l’individuo tornó t’o establimiento, por o que a suya propietaria tornó a clamar a la policía. L’hombre estió tresladau unatra vegada t’a comisaría, an que un oficial le instó a abandonar a ciudat menazando-le.

L’oficial sigue en o suyo puesto de treballo y o Concello ha declinau de fer declaracions alegando que i hai una investigación policial en marcha.

SOS Racismo Aragón se personó como acusación popular en a denuncia contra o policía por considerar que iste “abusó d’a suya superioridat” y plegó “a extremos d’o mas puro racismo” con iste migrant.

Fuent: http://arainfo.org/2014/10/policia-local-de-teruel-a-un-detenido-de-origen-colombiano-aqui-a-la-gente-que-da-por-culo-me-la-llevo-al-monte-te-caen-las-hostias-como-panes-y-alli-te-quedas/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.