Chuicio a “las once d’o tellau” d’o CSO Kike Mur de Zaragoza

20.000 € demandan a os "okupas" que resistioron a o desaloixo de l'antiga garchola de Torrero, desaloixau en chinero de 2011 y reocupau tres diyas dimpués

Momento d’o desaloixo d’o CSO Kike Mur. Foto: Arainfo

O venient diya 12 de setiembre serán chudgadas en Zaragoza “as once d’o tellau”, as once personas encausadas en o desaloixo d’o CSO (Centro Social “Okupau”) Kike Mur, que aconteció o 20 de chinero de 2011 en o vico de Torrero d’a capital aragonesa.

Istas personas se trobaban resistindo a o desaloixo en o tellau de l’antiga garchola de Torrero, a on s’ubica o CSO Kike Mur (clamau asinas en honor d’un insumiso que morió en ixa garchola en 1997), y se les acusa d’usurpación de l’edificio, de titularidat municipal, que yera vuedo a tamás d’as demandas d’os vecins de poder-se fer servir ta actividatz socials. O concello de Zaragoza ye o denunciant y demanda 20.000 € de pinyora que si no pagasen les podría levar t’a garchola, si o veredicto d’o tribunal estase asinas.

O CSO Kike Mur estió ocupau en octubre de 2010, pocos diyas dimpués d’o desaloixo d’o CSO “La Vieja Escuela” que se trobaba en l’antigo y albandonau colechio Lestonnac, tamién en o vico de Torrero, prencipiando a suya actividat con un hackmeeting (trobada de hacktivistas y autochestión dichital). Meses dimpués, a policía nacional espanyola procedió a desaloixar l’edificio en una actuación prou criticada por os movimientos socials y asociacions vecinals, que causó bells ferius y remató con un deteniu en as cargas policials que se producioron en una concentración espontania de refirme a os “okupas” amán de l’antiga garchola.

Manimenos, l’edificio estió reocupau tres diyas dimpués en rematar una manifestación en o mesmo edificio en protesta por o desaloixo debant d’a sorprendida uellada d’a unidat d’antidisturbios d’a policía local zaragozana (UAPO), que cusiraba l’antiga garchola y que habioron de marchar-ne debiu a la gran cantidat de personas presents en a puerta de l’edificio y a negativa d’a policía nacional espanyola d’amprar-les refuerzos.

En dito edificio se fan actividatz como conciertos, charradas, chornadas, prochección de cine, chentas veganas os domingos, cursos (mesmo l’anyada pasada se i fació un curso d’aragonés), y atras actividatz socials y culturals ubiertas a toda mena de chent. Amás i hai espacios como un taller de bicis u una botiga de baldes  Tamién ye a siede d’a radio libre “Radio Chabolo” en o 107,6 d’a FM.

O venient sabado i hai convocada una manifestación en refirme a “las 11 d’o tellau”, amás d’una concentración en os chudgaus o mesmo diya 12.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.