Cinco aragoneses entre os muertos en l’accident de l’Airbus 320 en os Alpes

Continan as identificacions d'os fallecius en l'accident aerio. Por agora s'ha confirmau por fuents no oficials a cifra de 5 aragoneses muertos

Minuto de silencio en o Gubierno d'Aragón. Foto: Gabinete de Comunicación d'o Gubierno d'Aragón

Minuto de silencio en o Gubierno d’Aragón. Foto: Gubierno d’Aragón

A presidenta aragonesa, Luisa Fernanda Rudi, dio ahiere o dato d’a lo menos cinco aragoneses muertos en l’accident aerio d’os Alpes, encara podría estar-ne seis. Rudi citó fuents encara no oficials pero “de solvencia”.

E. R. C. yera director cheneral d’a planta que una interpresa alemanya tien en Epila. Se desplazaba ta Düsseldorf por motivos de treballo. Encara que treballaba en Epila, viviba en Zaragoza.

M. B. L. B. y o suyo borche de 7 meses viviban en Manchester pero yeran de Chaca. S’heban desplazau enta Zaragoza ta asistir a o funeral d’un tío suyo. En no tener en ixes momentos un vuelo directo enta Manchester, pilloron un vuelo d’enlaz ta Düsseldorf. A ciudat pirinenca ye consternada por a noticia, pus a suya familia ye bien conoixida en a localidat.

V. S. y E. S., chirmans d’Urreya de Gayén, teneban una interpresa en María de Uerva. Os suyos familiars han confirmau que iban a pillar ixe vuelo.

Hue a las 12 h., s’ha realizau un minuto de silencio en tot o Estau espanyol, do s’ha declarau tres días de luto oficial.

Provisionalment, 51 personas de ciudadanía espanyola han estau confirmadas como victimas de l’accident. 15 personas son encara en proceso d’identificación. Achents d’a Policía Nacional y d’a Guardia Civil espanyolas se desplazarán t’o puesto de l’accident pa realizar as correspondients identificacions d’os cuerpos. Ya han pillau ADN de familiars pa achilizar o proceso.

Mofla a las victimas

O Ministerio d’Interior espanyol ha ordenau a las Fuerzas y Cuerpos de Seguridat d’o Estau a investigación de tuits que se feban a mofla d’as victimas catalanas. Os Mossos d’Esquadra han identificau vintiquatro tuits de decisiet cuentas de Twitter que podrían estar delito d’odio. L’asociación catalana Drets, seguntes informa Vilaweb, podría portar a la Fiscalía mesmo 200 tuits ofensivos.

Una rispuesta a Cinco aragoneses entre os muertos en l’accident de l’Airbus 320 en os Alpes

  1. Pingback: Cinco aragoneses entre os muertos en l’accident de l’Airbus 320 en os Alpes | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.