Cinco millons d’euros más ta “estabilizar laderas” dimpués d’a visita de De Pedro a Yesa

Os vecins de Yesa piensan en prencipiar accions chudicials. A CHE informa d'una "segunda fase d'estabilización".

Entibo de Yesa y a ladera dreita (Foto: CHE)

Entibo de Yesa y a ladera dreita (Foto: CHE)

A visita de Xavier de Pedro, president d’a Confederación Hidrografica de l’Ebro (CHE) t’as obras de Yesa iste chueves, ha rematau con l’anuncio d’una segunda fase d’obras en o redol de l’entibo de Yesa ta “estabilizar as laderas”  y “guaraciar a seguridat d’as urbanizacions y infraestructuras que bi son”.  Seguntes a propia CHE, istas obras se suman “a las midas ya presas que han conseguiu aturar o movimiento y que basicament han pendiu en cavar 500.000 m3 d’o cobalto d’a ladera”. Antimás s’ha anunciau una muga de gasto de 15 millons d’euros, puyando asinas l’anterior cifra de 10 millons en un 50%. Tot lo recreiximiento, diz a CHE, podría estar rematau ta 2016.

Cuanto a lo realoix d’as personas que viviban en a urbanización d’Anaitasuna en Yesa (Navarra), a CHE creye que podrían tornar-ie enta cabo d’anyo. As casas levan desaloixadas dende febrero, quan bells movimientos de tierras en a redolada, facioron a la Confederación organizar o desaloix en meter-se en periglo toda la urbanización. Entre o vecinamen, no se confita guaire en que lo problema se pueda apanyar y se son pensando en prencipiar accions chudicials contra la CHE. O pasau 15 de chunio, una manifestación en Sangüesa se concaró con rasmia contra o entibo demandando que s’aturasen as obras.

As obras que se han anunciau hue en Yesa incluyen cavar dica 1.500.000 metros cubicos de ladera, antimás de meter-ie muros de contención y anclaches t’aparar a ladera. Entre as cotas 460 y 520 se meterán muros de formigón y replenos baixo a cota 490. Ta “achiquir lo impacto ambiental, se meterá tierra vechetal, arbols y hidrosiembra. Tamién s’amillorará o rete d’abastecimiento d’as urbanizacions afectadas por o movimiento y a linia aerea de suministro electrico”.

A CHE ha quiesto antimás contrarrestar os efectos d’as declaracions de bells expertos cheologos, qui recomendoron desaloixar mesmo Sangüesa por o periglo d’os movimientos de tierras, y han meso a disposición d’o publics atros estudios feitos por universidatz de Madrit, Catalunya y l’aragonesa.

 

 

Cuanto a las brecas de prou grandaria que continan surtindo por as laderas, a CHE ha esfendiu que “no son nuevas” y que son aintro d’un “proceso normal d’adaptación d’a ladera t’as nuevas condicions d’equilibrio”. A Confederación se cura en salut avisando que as brecas “pueden reproducir-se en tot lo perimetro dica que se consolide de tot lo terreno”.

Precisament iste cabo de semana continan as accions y protestas d’os afectaus por l’entibo y o suyo recreiximiento, ista vegada en o lugar d’Artieda. Dende o viernes se i celebra o festival “Esfendemos a tierra“, a on que, antimás de conciertos y charradas, se ferá una cursa t’as obras d’o recreiximiento denunciando os efectos que tien l’actual entibo y que tendría o recreiximiento.

 

Una rispuesta a Cinco millons d’euros más ta “estabilizar laderas” dimpués d’a visita de De Pedro a Yesa

  1. Pingback: Cinco millons d’euros más ta “estabilizar laderas” dimpués d’a visita de De Pedro a Yesa | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.