Cinco sindicatos aragoneses contra as reformas y retalladas

Ferán una manifestación unitaria o chueves 16 de febrero por as carreras d'a capital

As carreras de Zaragoza veyerán o venient chueves 17 una manifestación unitaria d’os sindicatos CATA, CGT, CNT, Intersindical y SOA ta protestar contra as retalladas y as reformas que se planteyan dende o gubierno y o gubierno d’Espanya. Seguntes istos sindicatos a reforma laboral suposa a desregularización d’o mercau laboral y a perda de dreitos aconseguius con quaranta anyos de luita obrera. Asinas l’ha afirmau hue en una rueda de prensa a secretaria cheneral de CGT Aragón, Irene de la Cuerda, qui ha dito tamién que la reforma laboral afogará en a miseria a amplas capas d’a sociedat quan bi’n ha once millons d’espanyols en o branquil d’a pobreza.

En a suya opinión, o PP ye complindo o suyo papel en esfensa d’as clases poderosas, fendo midas en cascada sin tiempo t’a una reyacción, y a sola traza d’aturar istos ataques ye a mobilización en a carrera, y sobre tot interpresa por interpresa, como en os anyos 70. Amás, ha criticau l’actitut d’UGT y CCOO como sinyadors de l’II Alcuerdo ta l’emplego y a negociación colectiva chunto a la CEOE y Cepyme, porque ha estau a previa d’a reforma laboral. Amás d’a manifestación d’o proximo chueves en Zaragoza, que partirá a las 19.30 horas dende a plaza de Santa Engracia y finalizará debant de l’edificio Pignatelli, siede d’o Gubierno, os sindicatos de “clase de verdat”, ha dito, ya se’n son planteyando a convocatoria d’una vada cheneral. Ha subrayau que os triballadors son sin guarencias y esfensa y ha reconoixiu que actualment tienen medrana a perder l’emplego y lis cuesta a-saber-lo de reyaccionar, pero son indignaus y a la fin ferán o trango y se movilizarán.

Por a suya parte, David Ubico, d’a Intersindical d’Aragón, ha afirmau que o scenario ye brutal y que la reforma laboral talment no s’hese aprebau si no bi hese habiu una claudicación constant a la patronal y os bancos, porque s’ha “supeditau tot a os intreses d’os mercaus y os triballadors han estau desemparaus. A la manifestación d’o chueves ya han amostrau o suyo emparo a Iniciativa Social d’Aragón integrada en a coalición a Cucha d’Aragón (IU-CHA) y as Mesas de Converchencia d’Aragón.

Deja un comentario

Tu dirección de correo electrónico no será publicada. Los campos necesarios están marcados *

Connect with Facebook

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.