CiU pierde peso pero l’independentismo vence con fuerza en Catalunya

Amarga victoria de Mas en as eleccions catalans a on pierde 12 cadieras. O sector independentista de cuchas puya con fuerza. As CUP i dentran con 3 diputaus

Imachen: Vilaweb

As uelladas yeran mesas sobre as eleccions catalanas d’ahiere, en as que indirectament se votaba a posibilidat d’un referendum sobre a indepedencia alentau dende CiU, y directament se meteba a preba a politica d’o president catalán, Artur Mas. CiU ganó as eleccions con 50 cadieras, pero ha sufriu una perda de 12 cadieras respective a las eleccions de 2010. Se preveye una lechislatura complicada y con dificils pactos.

Encara que ista perda de votos de CiU ha estau interpretada en bells ambitos como a redota d’un prochecto soberanista, cal enfocar ista perda de refirme en a profunda politica de retalladas d’o gubierno d’Artur Mas. Manimenos, os atros partius soberanistas han puyau enormement en ista cita electoral. Un total de 87 diputaus (uno mas que en 2010) han obteniu istos partius (CiU, ERC, ICV, CUP) por os 48 (uno menos que en 2010) d’os partius unionistas que advogan por que Catalunya contine estando una rechión d’Espanya (PSC, PP, Ciutadans) por o que se veye con claridat a victoria de l’independentismo catalán que obtiene dos terceras partes d’o Parlament.

ERC se convierte en a segunda fuerza parlamentaria con 21 diputaus, puyando dende os 10 de fa dos anyos. CiU ha feito sin fer-lo directament un clamamiento a ERC ta gubernar con ells, pero os republicanos catalans meten dos condicions ta ixo: que i haiga un compromís claro con a celebración d’o referendum independentista y que i haiga un cambeo en as politicas economicas, o punto mas polemico d’un posible acuerdo de gubernabilidat.

O PSC ha teniu os piors resultaus en unas eleccions obtenendo 20 cadieras, con o que en pierde 8, encara que han puesto quitar millor resultau d’o que deciban as enqüestas. Pere Navarro ha evitau por agora fablar sobre a posibilidat de fer pactos con CiU.

Un diputau puya o PP, dende 18 diputaus dica os 19 que en consiguió ahiere. Alicia Sánchez-Camacho declaró que Mas tien una anvista “muit complicada; muito mas dificil que no antes”.

ICV puya dica 13 cadieras dende as 10 que en consiguió en as pasadas eleccions, tenendo os millors resultaus d’a suya historia. Joan Herrera ha declarau que refirmará o dreito a decidir d’os y d’as catalanas, pero si as politicas d’austeridat s’aturan, castigadas en as urnias.

A mayor puyada en o sector unionista fue ta Ciutadans, que puyó dende 3 diputaus dica 9. O mayor refirme lo consiguiron en Barcelona (8 diputaus por 1 en Tarragona). Iste mayor refirme en Barcelona les ha levau a tener 6 diputaus mas que no as CUP tenendo 20.000 votos menos que a candidatura independentista en o conchunto de Catalunya. Albert Rivera considera que Mas ha de dimitir u ells presentarán una moción de censura.

Talment a mayor sorpresa la protagonizoron as CUP (Candidatures d’Unitat Popular), que dentroron en o Parlament con 3 diputaus con un treballo de base, sin subvencions, municipalista, independentista y anticapitalista. Ye a primer vegada que se presentan a unas eleccions a o Parlament catalán, o que estió discutiu por os suyos militants y aprebau por una gran mayoría finalment. As CUP s’han convertiu en l’asperanza d’a cucha no reformista ta levar a voz d’o pueblo a o Parlament sin deixar a suya luita difuera d’ell.

Respective a la participación, ha estau a mas altera dende 1980, con un 69% de participación, 11 puntos mas que no en 2010.

Una rispuesta a CiU pierde peso pero l’independentismo vence con fuerza en Catalunya

  1. De tots els diaris que he llegit de fora de Catalunya, crec que és el vostre és el que millor s’ha acostat a la realitat de la notícia. Felicitats per la vostra objectivitat. I recordeu que no només teniu lectors aragonesos!

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.