Claman a una gran movilización a favor d’a reunificación de Bretanya

As collas bretonistas quieren aprofeitar a puerta ubierta por Hollande sobre a reorganización d'o mapa rechional

cartelAs collas Bretanya Reunida y 44 = Breizh han convocau una movilización ta presionar a lo gubierno francés a favor d’a reunificación de Bretanya. Baixo o lema “Ni statu quo, ni Gran Ueste“, os dos colectivos consideran que cal aprofeitar a ocasión ta que a reunificación d’o país “no se torne a trancar ni a ignorar por enesima vegada”. A manifestación se ferá en NAntes (capital historica de Bretanya encara que agora ye aintro d’a rechión d’o País d’o Loira) o 19 d’abril.

A convocatoria plega dimpués de que o president de Francia, François Hollande, haiga recuperau un prochecto d’o suyo predecesor en o cargo, Nicolas Sarkozy, ta reorganizar o mapa rechional. Hollande esfiende reducir o numer de rechions oficials a una quincena y ixo podría afectar a Bretanya. D’una man, podría ubrir a puerta a la reunificación: ye decir, que o departamento de Nantes, o Loira Atlantico, dentrase a fer parte de Bretanya con os atros quatre departamentos que ya i son. Pero d’atra man, tamién podría pasar que a reducción de rechions se fese simplament con a fusión d’as actuals rechions de Bretanya, País d’o Loira, Poitou-Charentes, lo que fería naixer una rechión d’o Gran Ueste.

O movimiento bretón s’oposa tanto a la situación actual como a que desapareixca Bretanya aintro d’un conglomerau más gran, como sería o d’o Gran Ueste. Dica hue, as mugas d’iste Gran Ueste s’emplegan como circunscripción electoral t’as eleccions europeas.

En 2008, arredol de 10.000 personas – seguntes a organización – se manifestoron en Nantes demandando a reunificación de Bretanya. En as anyadas de dimpués s’han feito atras concentracions con o mesmo obchectivo.

Fuent: http://www.nationalia.cat/ca/noticies/1756

Una rispuesta a Claman a una gran movilización a favor d’a reunificación de Bretanya

  1. Pingback: Claman a una gran movilización a favor d’a reunificación de Bretanya | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.