‘Claus ta un present en crisi’ seminario iste martes en Zaragoza

Presentación d'a edición en castellán d'a revista 'New Left Review' y discusión sobre a conchuntura actual

 

A revista New Left Review se presentará o diya 30 en a capital aragonesa

A revista New Left Review se presentará o diya 30 en a capital aragonesa

Iste martes, 30 d’aviento, en o Centro d’Historias (sala Mirador) a las 19h, tendrá puesto un acto de discusión sobre a conchuntura actual, aintro d’o qual se presentará a revista  New Left Review , que ha estau una referencia a la hora d’explicar a crisi economica y as suyas conseqüencias sobre as poblacions d’a planeta. L’acto ye organizau por Nociones Comunes de Zaragoza, un colectivo d’autoformación politica que fa parte d’a  Fundación de los Comunes. Bi participarán l’editor d’a revista en castellán,  Carlos Prieto del Campo  y  David Vila Viñas  que ye l’investigador principal d’o prochecto  FLOK Society  asinas como distintas personas que treballan actualment en as iniciativas electorals Podemos Zaragoza y Ganemos Zaragoza.

A situación actual, y a posibilidat de prener democraticament as institucions, que se concreta en os nuevos dispositivos politicos electorals como Podemos u os distintos Ganemos/Guanyems que han surtiu a ran municipal, nos exiche un alto grau d’innovación y audacia a la hora de planteyar solucions t’os asabelos problemas que van amaneixendo. Ta ixo, ye imprescindible enamplar a imachinación politica a atras formas de producción y que nos permitan superar os empandullos en os quals ha naufragau o rechimen d’o 78 y encetar un dialogo ya urchent con istes grupos que son protagonizando ista achuga democratica en o nuestro territorio.

A presentación profundizará en a crisi politica d’Europa y a crisi d’o capitalismo como variables que explican a emerchencia de nuevos espacios de politización y de nuevos ciclos de movilización social. A partir d’iste diagnostico, s’analisarán as posibilidatz de modificar l’actual ciclo d’achuste d’o capital europeu y a suya relación con as formas de democracia existent.

D’ista analís se podrán extrayer qüestions relacionadas con l’actual ciclo d’asalto institucional que podrán servir de fundamento t’o debat posterior, como por eixemplo a qüestión de qué sucheto politico ye estando o protagonista d’o cambeo, quáls son as nuevas formas d’organización y adhibición politica, etc

Amás, se discutirá sobre a especial importancia que tiene a democracia respective a qualsiquier escenario d’alternativas economicas y politicas de cierto calau. Asinas, a qüestión no sería tanto a etiqueta d’ixas alternativas como entender o funcionamiento d’a producción contemporania colectiva, a fin de maximizar a potencia cooperativa en o contino d’a producción economica y politica.

Nota: a NLR se publica bimensualment por meyo d’a colaboración entre a Secretaría d’Educación Superior, Sciencia, Tecnolochía y Innovación, l’Instituto d’Altos Estudios Nacionals d’Ecuador y Traficantes de Sueños con licencias ubiertas, ye dicir, os textos son accesibles ta totz, con a necesidat consiguient de suscriptors/as que faigan viable a suya producción.

 

 

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.