CNT ocupa simbolicament a Seguridat social ta prencipiar una campanya en esfensa d’as pensions

Exichen o reparto d'a riqueza y o treballo

Imachen de l'acto d'iste lunes (Foto: CNT)

Imachen de l’acto d’iste lunes (Foto: CNT)

CNT d’Aragón y La Riocha prencipioron iste lunes una campanya en contra d’os “retalles en as pensions y a favor d’unas pensions dignas ta todas y totz”. Lo querioron fer d’una traza bien vistera, ocupando simbolicament a siede de l’Instituto Nacional d’a Seguridat Social (INSS) mienters una hora y fendo dimpués una concentración en a carrera Dr. Cerrada de Zaragoza.

Con ista campanya quieren exichir midas ta “repartir o treballo y a riqueza” y claman a las movilizacions contra las nuevas retalladas d’o gubierno. Antimás, CNT ha refusau as propuestas d’a “colla d’expertos” que o gubierno “ha planteyau en a mesa de negociación a lo sindicatos institucionals y a la patronal” y que, seguntes iste sindicato “no fa que retallar dreitos y prestacions a los treballadors y treballadoras en a suya chubilación”. O sindicato ha quiesto remerar que tamién refusó en 2011, l’alcuerdo sobre pensions que sinyó o gubierno d’o PSOE con a patronal y CCOO y UGT, y que “asumiba os principals argumentos d’o discurso neoliberal sobre las pensions publicas”

Ta CNT, “as pensions s’han de financiar con as contribucions d’a sociedat, baixo lo principio de “cadagún seguntes as suyas posibilidat, ta cadagún seguntes as suyas necesidatz”, guarenciando pensions diganas ta totz y todas”. “Ta ixo, as contribucions interpresarials y financieras t’as pensions han de puyar”, esfienden dende CNT, qui adhiben que “os suyos esquilmens no han deixau de puyar entre que os nuestros chornals cayen a tot estrús”.

O sindicato, antimás, creye que os sistemas privaus de pensions “no han de tener garra refirme publico” y apuestan por l’autochestión y democratización d’os sistemas de protección social.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.