Coagret amuestra a suya indignación y refús a la declaración d’intrés publico de l’entibo de Mularroya

Dimpués d'anyo y medio d'as sentencias chudicials, l'entibo contina sin una declaración d'impacto ambiental positiva

Protesta de COAGERT (Foto: Arainfo)

Protesta de COAGERT (Foto: Arainfo)

Coagret ha amostrau, en un comunicau, a suya “indignación y refús” a l’aprebación que se fació iste viernes de man d’o Gubierno espanyol d’a declaración d’intrés publico de primer orden t’as obras de l’entibo de Mularroya.

Coagret denuncia que dimpués d’as dos sentencias de l’audiencia Nacional y d’o Tribunal Supremo, anulando o prochecto actual, lo que suposó l’ature d’as obras, y a salida a información publica d’a nueva declaración d’impacto ambiental, en chuliol de 2014, o Ministerio d’Agricultura, Alimentación y Medio Ambient “ye estau incapable d’aprebar una declaración ambiental positiva, encara que faigan de cabo ta quan declaracions trunfalistas tanto Xavier de Pedro como Arias Cañete antes y García Tejerina agora”.

En opinión d’a organización ecolochista “pareixe lochico pensar que si en un anyo y meyo no han estau capables de fer una declaración positiva, encara que bi haiga voluntat d’os maximos responsables d’o Ministerio y a CHE, puet estar por a dificultat de salvar os grieus impactos ambientals que fa iste prochecto en as zonas protechidas afectadas por l’entibo, como a zona ZEPA “Desfiladores del Rio Jalón” u a zona LIC d’as Foces d’o río Xalón.

“Ye por ixo – adhiben-, ta pasar por dencima d’o procedimiento tramitau en o proio Ministerio, que se fa ista declaración d’intrés publico de primer orden, d’alcuerdo con a Lei de Patrimonio Natural y d’a Biodiversidat, y a suya regulación posterior en ordens ministerials, que faculta a lo Gubierno ta que, en aquells prochectos con repercusions negativas significativas sobre Rete Natura 2000, istas se puedan salvar con a declaración d’intrés publico de primer orden, a traviés de midas compensatorias, con posterior comunicación a la Unión Europea”.

Istas  midas compensatorias pueden estar, seguntes informa Coagret tal y como replega a Lei 21/2013 d’Evaluación Ambiental, os Bancos de Tierras que son un instrumento de mercau ta compensar con más hectareas d’espacios naturals en atro cabo os impactos sobre una zona determinada. “Ye decir, a solución que o Ministerio ha puesto trobar ta salir d’o callizo sin salida que ye Mularroya ye ixamplar hectareas protechidas en atros espacios a muitos kilometros d’a zona afectada por Mularroya”, critican.

En as alegacions que presentó Coagret fa anyo y meyo a la declaración d’impacto ambiental de Mularroya acreditoron “prou os grieus impactos que iste prochecto fa, sin que calga pues bi ha alternativa ta satisfacer as demandas racionals d’augua que pueda haber-ie en a redolada”.

“Prou que en que s’aprebe a la fin por o Ministerio a declaración positiva, estudiaremos a posibilidat de recurrir en o contencioso administrativo ista declaración”, rematan.

CHA qüestiona a declaración d’intrés publico

O diputau de CHA en as Cortes d’Aragón y responsable de Medio Ambient, Joaquín Palacín, considera “vergüenyosa” l’aprebación d’a declaración d’intrés publico t’as obras de l’entibo de Mularroya.

Palacín tamién ha recordau as dos sentencias de l’Audiencia Nacional y d’o Tribunal Supremo que anulaban o prochecto actual y obligoron a aturar as obras y que hue encara no bi ha declaración d’impacto ambiental. “Ye sospeitoso – sinyala Palacín – que en anyo y medio no s’haigapuesto fer ixa declaración d’impacto ambiental y nos pensamos que ye debiu a los grieus impactos que iste prochecto tendría en zonas desprotechidas coomo ye a clamor d’o Río Xalón u as suyas foces”.

Fuent: http://arainfo.org/2014/12/coagret-muestra-su-indignacion-y-rechazo-a-la-declaracion-de-interes-publico-del-pantano-de-mularroya/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.