COAGRET y Río Aragón claman a “inundar” a CHE en a manifestación d’o diya 15

O 15 d'aviento en Zaragoza COAGRET, Río Aragón y arredol d'unas 60 organizacions socials, politicas y culturals amostrarán a suya disconformidat con a politica exercida por a CHE

Ahiere estió presentada a manifestación que COAGRET (Coordinadera d’Afectaus por os Grans Entibos y Trescoles) y Río Aragón chunto a unos 60 colectivos socials, politicos y sindicals ferán en a capital aragonesa en contra d’a politica d’a Confederación Hidrografica de l’Ebro (CHE) y d’as violentas cargas d’a Guardia Civil en Artieda o pasau 10 d’octubre, asinas como en refirme a os ueito imputaus que se solidarizaban ixe diya en contra d’as expropiacions d’o recreiximiento de l’entibo de Yesa.

Os convocants han destacau as conseqüencias economicas d’invertir en obras como o recreiximiento de Yesa u os entibos de Biscarrués u Mularroya, obras que podrían evitar-se por “alternativas mas baratas, eficients y sin conflictividat social ni afeccions meyoambientals ni economicas”, diners que podrían estar invertius en “educación, sanidat, servicios socials u qualsiquier atra cosa”. Curioso ye o caso de l’entibo de Mularroya, en o Xalón, un entibo declarau ilegal por l’Audiencia Nacional espanyola y que mesmo asinas contina fendo-se.

A las 11:30 horas ye convocada a movilización en frent d’a siede d’a CHE en Paseu Sagasta, manimenos a las 11 h. son convocadas columnas dende esferents puntos d’a ciudat ta acudir-ie. Dende a Pza. d’a Magdalena saldrán a chent d’Artieda, Río Aragón y a Chacetania. Dende a Pza. S. Francho os afectaus d’o Xalón y o Delta de l’Ebro, y dende a Pza. d’as Canteras de Torrero os afectaus de Biscarrués.

Una vegada en a CHE se ferá una concentración an que bi habrá diversas intervencions de personas d’Artieda u Río Aragón entre otris, amás de mosica popular y poesía. Dende astí, a las 12:30 h. se saldrá en manifestación dica a Pza. d’a Seu, pasando por o Paseu Independencia y a carrera Chaime I. Amás de diversas pancartas que portarán os esferents colectivos, bi’n habrá dos prencipals en as que se podrá leyer: “Contra a dictadura d’a CHE: ríos y lugars vivos” y “Imputaus por esfender a tierra. Ni bi pasetz ni bi pasaretz”. A manifestación rematará a la 13:30 h. con intervencions de COAGRET, de personas imputadas y con o manifiesto final leyiu por o periodista José Luis Trasobares.

Entre as organizacions que refirman a manifestación: Asociación Río Aragón, COAGRET, Coordinadera Biscarrués-Mallos de Riglos, Jalón Vivo, Asamblea de vecinos amenazados por el pantano de Itoiz, Plataforma en Defensa de l’Ebre, Ecologistas en Acción, Puyalón de Cuchas, Bloque Independentista de Cuchas, CHA, Equo, CGT, SOA, Decrecimiento Aragón, Asociacions de Vecins d’A Paz, Venecia, Actur-Puent de Santiago; Caracol Zaragoza, AraInfo, Radio Topo, Radio La Granja, os concellos d’Artieda, Bisarrués y Morillo de Galligo, Colectivo Pedalea, Os diaples d’a Uerba, entre atras asociacions politicas, socials, sindicals, ecolochistas y culturals d’Aragón y d’atros puntos de l’Estau.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.