Commemoración conchunta d’o Diya d’Aragón d’as Cortz y o Gubierno aragonés

A commemoración institucional d'o Diya d'Aragón ha contau con a presencia de muitas personalidatz politicas, economicas, culturals y socials aragonesas

diya aragon cortz

Foto: Cortz d’Aragón (www.cortesaragon.es)

Ahiere, 23 d’abril, Sant Chorche, patrón d’Aragón, o Palacio de l’Alchafaría de Zaragoza acullió a celebración conchunta d’as Cortz y o Gubierno aragonés d’o Diya d’Aragón. L’acto ha contau con una numerosa representación d’o mundo politico, economico, social y cultural aragonés.

A comitiva ha estau integrada por a Chunta de Portavoces, a Mesa d’as Cortz, o Gubierno aragonés entero, o maximo responsable de l’Exercito espanyol en Aragón y o Delegau d’o Gubierno. Tamién i han estau a Reyal Sociedat Economica Aragonesa y a Organización Nacional de Ciegos (ONCE), que han estau galardonaus con a Medalla d’as Cortz y o Premio Aragón 2013 respectivament, o Chusticia d’Aragón, a Presidenta aragonesa, Luisa F. Rudi y o President d’as Cortz, José A. Biel.

L’acto ha empecipiau con l’izau d’una bandera aragonesa en o Patio d’as Narancheras d’o palacio por parte de ninos d’o colechio publico Almozara, ganador d’un concurso de debuixo escolar sobre as Cortz aragonesas.

Dimpués s’ha procediu a la entrega d’a Medalla d’as Cortz a la Reyal Sociedat Economica Aragonesa, que ha replegau o suyo director, Honorio Romero. O President d’as Cortz, José A. Biel ha realizau un discurso en o que ha destacau a defensa de l’autogubierno y ha reclamau a politicos y ciudadanalla un mayor esfuerzo ta buscar l’intrés cheneral. Seguntes Biel, a luita contra a pobreza y creyar treballo ben d’estar obchectivos alazetals d’os poders publicos. Ha exhortau a retornar o prestichio a las institucions y a recuperar l’equilibrio entre chusticia, libertat y igualdat ya que nomás dende l’acuerdo “trobaremos respuesta a las demandas ciudadanas”.

Posteriorment, a Presidenta aragonesa, Luisa F. Rudi, ha entregau o Premio Aragón 2013 a la Organización Nacional de Ciegos (ONCE), que ha replegau o suyo president, Miguel Carballeda. Luisa F. Rudi ha feito o discurso institucional en o que ha dito comprender a indignación ciudadana, y ha insistiu en que “no i hai alcorces ni futuro fuera d’as institucions” y s’ha ubierto a “un espacio de trobada y consenso o mas amplo posible”. Asinas mesmo, ha comentau que a o suyo gubierno o que mas le’n fa ye o desemplego.

Con iste discurso ha rematau l’acto a o que tamién han asistiu diputaus, representants d’a Camara de Cuentas, d’as Diputacions provincials u d’os sindicatos mayoritarios, d’entidatz interpresarials y d’a Universidat de Zaragoza.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.