Concentración contra l’esboldregue d’Averly baixo la plevia

A mayor parte d'a fabrica centenaria sería esboldregada de continar entabant os plans d'o Concello y una promotora de viviendas

Imachen d'a concentracion

Imachen d’a concentracion (Foto: Bendrix)

Bellas decenas de personas, convocadas por a Plataforma Ciudadana Salvemos Averly, la Federación de Asociacions de Vicos de Zaragoza y la AVV. Casco Viello Juan de Lanuza, s’han concentrau iste mierques ta esfender a conservación d’a integridat de l’antiga Fundición Averly. Ye planeyau l’esboldregue d’o 60 % d’a fabrica ta construyir-ie doscientas nuevas viviendas.

Dimpués d’a concentración, que s’ha feito en a Plaza d’o Pilar, s’ha procediu a fer una asambleya ta decidir os trangos a prener dende iste inte. Representants d’os convocants son mirando de reunir-se d’urchencia iste mesmo maitin con representants d’as collas politicas con representación en o Concello de Zaragoza ta proposar-les midas alternativas. O chueves, antimás, s’ha convocau unatra concentración de protesta debant d’as instalacions d’a propia fabrica.

A fundición, con más d’un sieglo d’historia, ye una parte muito important d’o patrimonio industrial y cultural aragonés. O 40% d’ella, a parte que no s’esboldregaría, estió declarada Bien d’Intrés Cultural por a D.Ch.A. a primers d’anyo. Ta muitas asociacions vecinals y de protección d’o patrimonio isto no’n ye prou y exichen que todas las instalacions sigan consideradas parte d’ixe patrimonio.  En a fabrica se facioron muitas d’as piezas que hue os zaragozanos son feitos a viyer, como a escultura d’o Chusticia d’Aragón, a Fuent d’a Samaritana, o lión d’a estatua de Alifonso lo Batallero, u atras cosas más cutianas como farolas, papeleras y fuents.

 

Una rispuesta a Concentración contra l’esboldregue d’Averly baixo la plevia

  1. Pingback: A presión ciudadana salva Averly por agora | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.