Concentración en Zaragoza contra a violencia masclista

Cinco mullers han estau asasinadas en o Estau espanyol mientres o mes de chinero, estando o mes mas trachico en os zaguers diez anyos

violencia-machista-300x298O pasau mes de chinero estió “o mas trachico t’a violencia de chenero en o zaguer decenio” en o Estau espanyol, informan dende a Comisión d’a Muller d’a FABZ, “cinco mullers han estau asasinadas por a violencia masclista en as ciudatz de Barcelona, Lugo, Cordoba, Madrit y Tenerife”.

Dende a Comisión d’a Muller d’a FABZ quieren “sensibilizar a la ciudadanía contra ista lacra y denunciar os retalles que ye aplicando o gubierno d’o PP en ista materia y que s’han visto refleixaus en os Presupuestos Chenerals d’o Estau”, por tot ixo convocan una concentración de repulsa contra a violencia masclista hue martes, 4 de febrero, a las 19.00 horas en a plaza d’Espanya de Zaragoza.

“Venitz-ie con as vuestras camisetas moradas! Por que as mullers no se retallan. Si yes d’alcuerdo con a igualdat de dreitos y debers entre hombres y mullers, no dubdes en venir a la concentración”, enfatizan dende a FABZ.

O IAM quiere amugar o rechistro en a estatistica de violencia masclista a os casos d’hespitalización

Tanto colectivos feministas, como CHA y IU han expresau a suya preocupación por ista nueva mida proposada por l’Instituto Aragonés d’a Muller -IAM-. Asinas, Patricia Luquin, portavoz de Bienestar Social d’IU, califica como “muit grieu amugar o rechistro en a estatistica de violencia masclista a os casos d’hespitalización como proposa a directora cheneral de l’IAM, isto ye, rechistrar en as estatisticas de violencia masclista nomás os casos de mullers que haigan habiu d’estar hespitalizadas a lo menos 24 horas”.

“Ye muit preocupant que o Gubierno d’Aragón no meta freno y no dispose os recursos necesarios ta aturar y acabar con ista lacra que ha de veyer con codigos socials adquirius en procesos de socialización y d’educación y que solament treballando en as claus implicitas que se transmiten culturalment se privarán os asesinatos de mullers”, explica Luquin ta advertir que “contabilizar en as estatisticas nomás os casos que embrequen hespitalización ye falsiar os datos, restar importancia a un problema real que en un decenio tiene una conseqüencia contable, 700 mullers asasinadas en o Estau espanyol, y disuadir a las mullers en a denuncia de malos tractos efectuaus por parte d’as suyas parellas”.

Fuent: http://arainfo.org/2014/02/concentracion-en-zaragoza-contra-la-violencia-machista/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.