Concentracions contra a perda d’o medico de Biscarrués-Ardisa

Quantos municipios aragoneses se concentroron ahiere en defensa d'os suyos servicios medicos, en respuesta a la supresión de bella plaza por o gubierno aragonés

Foto: AraInfo

Foto: AraInfo

Dende o luns 15 de setiembre en Aragón “seremos mas pobres porque Sanidat va a escomenzar os suyos retalles y os centros de salut contarán con muitos profesionals menos”, denuncian en una nota de prensa as y os vecins de Biscarrués, que contan con o emparo d’os concellos de Biscarrués y Moriello, y que se concentroron ahiere igual que en atros municipios en defensa d’a sanidat.

Ista semana o Gubierno d’Aragón ha iu clamando a beluns d’os concellos a os que va a aplicar os retalles en o nuevo mapa d’a sanidat aragonesa en o mundo rural. O luns se les comunicó a os concellos d’Ayerbe, Moriello y Biscarrués que o Centro de Salut d’Ayerbe contaría con un medico menos, pasa de 6 a 5 y a plaza que se suprime ye o medico de Biscarrués-Ardisa que amás fa guardias y refuerzos en Ayerbe y a resta de lugars d’a zona.

Biscarrués será atendiu por o medico que ya lo fa en Moriello y Agüero con a suya residencia de mayors por o que istes dos lugars tamién pierden en un servicio fundamental.

Una decisión “doblement escandalosa” por o que suposa “sacar un servicio basico pa os lugars y por unatro costau porque chusto antes d’as eleccions europeas quan ya sacoron a plaza y la cubrioron con una interina clamoron a os de Biscarrués mentirosos por denunciar ista supresión que hue se fa realidat”.

En a nota denuncian que “a la suya vez en a reunión solament se clamó a tres concellos sin dignar-se a comunicar-les a Ardisa que pierden o servicio y agora solament baixará a demanda por tener 9 tarchetas sanitarias, que no ben d’estar personas con cuerpo, solament una tarcheta de plastico, ni a Agüero que pierde días d’atención”.

“D’ista forma -adhiben-, lamentablement, se confirma a supresión d’ista plaza de medico y a perda de servicios pa os lugars que solament s’ha retardau dica pasar as eleccions europeas pero que finalment s’ha executau ista inchusta perda pa lo mundo rural”.

A semana venient han convocado una reunión entre os concellos afectaus pa solicitar que no se realice iste retalle de servicios basicos. Ahiere se fació una asambleya vecinal.

“Ye important saber que i hai mas retalles planteyaus. O centro de salut de Luna l’anyo pasau le sacoron un medico y agora unatro quedando-se-ne con 4. Dimpués d’entrar os d’a nuestra zona yeran uns de Teruel asperando os retalles”, lamentan.

Fuent: http://arainfo.org/2014/09/concentraciones-contra-la-perdida-del-medico-de-biscarrues-ardisa/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.