Confirmada la existencia d’ondas gravitacionals, la zaguera predicción d’Einstein

Los scientificos de l’Instituto Tecnolochico de California (Caltech), con a colaboración scientifica d'o experimento LIGO, han anunciau que heban puesto confirmar la existencia d'as ondas gravitacionals en o espacio, a zaguera predicción d'a teoría d'a relatividat d'Einstein que encara s'heba de confirmar.

Imachen: Vilaweb

Imachen: Vilaweb

Cient anyos dimpués d’a predicción d’Albert Einstein, encara no s’heban puesto detectar directament. Pero los scientificos d’o experimento LIGO han explicau en una conferencia de prensa en a National Science Foundation (de Washington) que las ondas gravitacionals causadas por un gran colapso cosmico heban travesau lo suyo detector y i heban deixau un sinyal visible.

Ya s’heba filtrau que lo sinyal detectau correspondeba a la radiación emitida entre la colisión de dos foratos negros en un sistema d’estrelas binario.

A detección d’as ondas gravitacionals puet dar mas información sobre bells fenomenos de l’universo, como por eixemplo a formación de foratos negros supermasivos y a connexión d’istos foratos con o naiximiento d’as galaxias; a la finitiva, pueden dar-nos información sobre la historia d’o cosmos.

En una entrevista feita por Vicent Partal en o programa de radio L’Internauta, Miquel Nofrarias, d’o grupo d’investigadors d’o Instituto d’Estudios Espacials de Catalunya explicaba: ‘Dica agora tot lo que sabemos de l’universo l’hemos aprendiu a traviés d’a luz:tenemos telescopios, antenas de radio, satelites que miran rayos X… Tot isto ye en o espectro d’as ondas electromagneticas, veyemos y entendemos l’universo a traviés d’ellas. Lo feito de detectar atra ondas, como las gravitatorias, implicaría utilizar un sentiu diferent, lo de l’oyiu, pa descubrir y explicar muitas cosas mas de l’universo’.

Tamién comentaba: ‘Las ondas gravitacionals son una predicción d’a teoría cheneral d’a relatividat, que va publicar Einstein fa cient anyos. Ista teoría nos explica la gravedat y cómo interacciona. Y la particularidat d’a teoría d’Einstein ye que va introducir ista novedat que relaciona la masa y la enerchía con la cheometría de l’espacio y d’o tiempo; va enlazar istos dos conceptos que antes, dende Newton, no se relacionaban. Ye decir, d’un costau ya i heba lo tiempo, y de l’atro lo espacio. Einstein los va unir y, a conseqüencia d’isto, si i hese masas que se movesen muit aprisa, la una arredol de l’atra en procesos muit enercheticos, iste teixiu, que ye o que denominamos espacio-tiempo, se veyería perturbau. Y las ondas gravitacionals son apuradament istas perturbacions que salen d’un sistema an que i hai masas en movimiento. Unas masas que producen unas radiacions que se propagan por l’espacio y que son istas ondas gravitacionals.’

Fuent: http://www.vilaweb.cat/noticies/en-directe-el-possible-anunci-de-la-deteccio-de-les-ones-gravitatories-deinstein/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.