Contina a vada en os minchadors escolars

A negociación entre sindicatos, patronal y gubierno contina sin plegar en garra alcuerdo

Protesta d'as monitoras (Foto: Monitoras de comedor Aragón)

Protesta d’as monitoras (Foto: Monitoras de comedor Aragón-CC.OO.)

A vada indefinida de treballadoras d’os minchadors escolars contina iste miercols por segundo diya, dimpués de que o Tribunal Superior de Chusticia d’Aragón suspendese os servicios minimos que heba decretau o Gubierno d’Aragón y que heban incumpliu os treballadors.

Iste martes, dimpués d’una reunión de cinco horas entre representants d’a Consellería d’Educación, d’os treballadors y d’a patronal se continó sin plegar en garra alcuerdo, encara que as partis reconoixen que se son fendo trangos enta debant. Dende Educación se proposó una nueva distribución de servicios mínimos que establiba una presencia d’o 25% como norma cheneral, más un monitor por cada 60 alumnos d’Infantil y 100 de Primaria y una representación d’o 50% t’os transportaus más un monitor por cada 30 escolars d’Infantil y atro por cada 50 de Primaria. Ta l’alumnalla d’Educación Especial se continaba proposando o 100%.

Os servicios minimos decretaus por o gubierno estioron consideraus “ilegals y abusivos” y mesmo bellas organizacions como IU u UGT han presentau una querella contra Dolores Serrat por prevaricación por iste afer.

Encara que os sindicatos “estudiarán a nueva ufierta”, ista no ye sinyada por lo que continará sin haber-ie servicios minimos en una vada que ye estando tot un exito fendo quasi aturar muitos servicios de minchador. O seguimiento ye de dica o 70% seguntes fuents sindicals. En total son 1.400 as personas que treballan en iste sector en tot lo país.

O martes de tardes, bellas quantas d’as treballadoras y de personas que las refirman se concentroron a las puertas d’o departamento protestando por a suya situación y chiflando y chilando en dentrar os representants de patronal y gubierno.

Un d’os principals entrepuces d’a negociación ye a propuesta d’a patronal de sacar os tres diyas de libre disposición a truca de proposar una puyada de chornal de nomás un 0,2% en 2013 y de 0,3% en 2014, muito por debaixo d’a puyada prevista d’o IPC. Antimás, as retalladas en as becas de minchador, ha feito que muitas d’as treballadoras estasen forachitadas, en baixar o numer d’alumnos que se i quedaban a chentar.

Una rispuesta a Contina a vada en os minchadors escolars

  1. Pingback: Contina a vada en os minchadors escolars | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.