Contina a vada estatal indefinida en a minería

En Teruel os miners advierten d'o recrudecimiento d'a vada si no i hai acuerdo, mientres en Asturias y Lión s'han produciu talles de carreteras y enfrentamientos con a Guardia Civil.

Concentración en Lión. Fuent: www.ileon.com

Contina a vada indefinida en a minería a ran estatal. En Teruel, una manifestación, convocada por os sindicatos miners con unas 600 personas ha recorriu as carreras de Teruel, que ha contau con chent plegada d’Arinyo, Utrillas, Andorra y Mequinenza. Mientres tot o recorriu s’han tirau petardos y s’han chilau consignas contra o Gubierno y os retalles. S’han penchau dos pancartas en a frontera d’a Subdelegación d’o Gubierno espanyol a on ha rematau a manifestación en as que se podeban leyer: “Nomás tenemos o carbón y pernil, si isto se’n va a muyir fardachos, imos a plenar tot de cochins?” y “A muerte d’as minas, a desolación d’os lugars, isto ye o que queremos ta Teruel?”. Os presents han quiesto estar recibius por l’alcalde de Teruel, Manuel Blasco, pero iste se trobaba en o Senau espanyol. Os miners veyen “negro” l’esvenidero d’os suyos puestos de treballo y d’as suyas redoladas. Advierten amás, que recrudecerán as protestas si no i hai acuerdo en a Comisión de Seguimiento que yera hue convocada. Os miners ya talloron o lunes l’acceso de carbón ent’a central termica d’Andorra por tren.

Tanimientres, en Asturias y Lión, continan as protestas con prou dureza. Unatra vegada s’han tallau autovías y carreteras, mas que no atros diyas, pues os miners devantaban barracalas y se’n iban a escape. Han puesto estar mesmo 20 os puntos tallaus hue. O trafico ferroviario tamién ha estau afectau en a linia FEVE Xixón-Laviana con arbols en as catenarias d’a linia.

Os momentos mas furos han aconteciu en o lugar lionés de Ciñera a on miners que heban feito una barracala en a N-630 s’heban acubillau en o municipio. Os Grupos Rurals de Seguridat (GRS) d’a Guardia Civil los han encorriu y han entrau en o lugar producindo-se una periglosa baralla aintro d’a localidat en a hora en que os ninos saliban de clase. A población teneba miedo de salir de casa mientres a Guardia Civil diparaba pilotas de goma y botes de fumo y encorreba a os miners, que s’esfendeban aventando piedras y que mesmo s’han acubillau en as casas que ubrían de propio os vecins. L’alcalde pedanio, Juan López Moral, ha resultau feriu por un pilotazo, asinas como un choven con un fuerte trucazo en una garra. Bells antidisturbios tamién han recibiu trucazos. L’alcalde de La Pola de Gordón (municipio de qui pende Ciñera) Francisco Castañón, ha trucau por telefono a o Subdelegau d’o Gubierno espanyol en Lión ta que retirase a la Guardia Civil debiu a o periglo d’as cargas en bell meyo d’a localidat, a lo que ha contestau afirmativament.

A tot isto cal adhibir-ie a vada indefinida de transporte en Asturias, que ha prencipiau con prou conflictividat y un masivo seguimiento seguntes os sindicatos (entre un 85 y un 95 %) y un seguimiento muit baixo seguntes as patronals d’o transporte.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.