Contina a vaga de BRIF

Treballadors y treballadoras d'a Brigada de Refuerzo ta Incendios Forestales de Daroca continan con o suyo enzarre en a siede d'a interpresa publica Tragsa

Foto: Pablo Ibáñez (AraInfo)

Foto: Pablo Ibáñez (AraInfo)

Os treballadors y treballadoras d’a Brigada de Refuerzo ta Incendios Forestals (BRIF) de Daroca continan enzarraus en a siede de Tragsa, a interpresa publica, con a quala mantienen un conflicto laboral que se prolarga entre muitos meses.

“Actualment nos trobamos en una situación de conflicto colectivo laboral en que interpresa y sindicatos negocian as condicions d’a BRIF, dimpués d’anyos de precariedat enta iste colectivo” aseguran os brigadistas.

En dita negociación os miembros d’a BRIF solicitan como puntos basicos y inamobibles a reconoixencia d’a categoría profesional de Bombero Forestal, segunda actividat y coeficients dignos de prechubilación y condicions dignas de treballo adequadas a o puesto desempenyau.

“A resultas d’a constant negativa a la millora d’as nuestras condicions y a l’enroque existent entre Ministerio de Medio Ambient, Medio Rural y Marino y Tragsa, nos hemos visto obligaus a prencipiar ista vaga de tres días en periodo de maximo risgo d’incendios forestals” una situación no deseyada, como s’ha puesto comprobar con l’actuación de qualques brigadistas de BRIF Tabuyo, que acudioron como voluntarios, sin cobrar sueldo en estar en vaga, a safocar un incendio en Quintana del Castillo, Lión.

Recuerdan que ista vaga “naixe con l’obchectivo d’aconseguir un alcuerdo en a mesa negociadora d’o convenio” an que se refleixen as suyas reivindicacions, y insisten que de no plegar en un alcuerdo i hai convocada una vaga indefinida prevista t’o 27 de chuliol.

Como mida de presión en istas tres chornadas de vaga os miembros d’a BRIF de Daroca s’han enzarrau en as oficinas d’a delegación de Tragsa Zaragoza, ta amostrar o suyo descontento y fer veyer a la interpresa a suya implicación y decisión en a luita. Cal destacar que as diez bases BRIF existents a nivel estatal han secundau a vaga con quasi a totalidat d’o personal d’extinción embrecau en a mesma, amás de realizar atras accions reivindicativas.

“A nuestra valoración dimpués d’o primer día de vaga y a primera nueit d’enzarre ye muit positiva, o seguimiento estió d’o 100% d’o personal d’extinción d’a base de Daroca”. Insisten que l’enzarre transcorre con total “tranquilidat y respecto tanto ent’os treballadors d’a delegación como a las instalacions, as qualas femos servir como punto de reunión ta realizar una asambleya y, valurar l’inicio d’a vaga, de vez que trazar una fuella de ruta t’as dos chornadas siguients”.

Amás cal destacar un suceso mas que preocupant en o helipuerto d’a BRIF de Daroca o primer día de vaga. Existindo indicios de sabotache, pues o candau d’a puerta se trobaba sellau y i heba un butrón en a cleta. Os especialistas se qüestionoron o embarque y o Ministerio les obligó a volar sin parar cuenta en a preocupación d’os mesmos, alegando que a revisión mecanica a os helicopters ya s’heba realizau satisfactoriament.

En tornar de l’incendio se comprobó que amás s’heba boicoteyau o sistema electrico. “Queremos constatar tamién que ye agora con motivo d’a vaga, que s’ha procediu a l’achuste d’un guardia churau ta cosirar as instalacions d’o helipuerto quan, dica a calendata, no heba existiu preocupación denguna por salvaguardar a integridat d’os helicopters y, con ella, a nuestra propia seguranza”.

Finalment, os brigadistas recordan que de no aconseguir garra alcuerdo fehacient que satisfaga as suyas reivindicacions de hue, as demandas seguirán estando as mesmas o 27 de chuliol, día en que daría encomienzo a vaga indefinida. Amás, recordan que iste viernes se celebrará una concentración en a Plaza d’Espanya de Zaragoza a las 19.00 horas. Una concentración a la quala os treballadors enzarraus acudirán caminando dende a interpresa Tragsa en a Carretera Castellón, y animan a la ciudadanía a amostrar tot l’emparo en totz dos actos, ya sía caminando con ells u asperando-les en a concentración.

Servicios minimos abusivos

En a orden ministerial remitida por a Ministra Isabel García Tejerina, o pasau 13 de chuliol, por a quala s’estableixen os servicios minimos entre a vaga d’as Brigadas de Refuerzo contra Incendios Forestals (BRIF) d’os días 15, 16 y 17 de chuliol de 2015 en a interpresa Tragsa, y en relación con o servicio de defensa contra incendios forestals, s’ha parau cuenta en a situación de maxima alerta climatica en que se troba a nuestra peninsula, y a previsión que a ola de calor se prolargue en o tiempo, ta establir o criterio a la hora de quantificar os servicios minimos.

Asinas mesmo, a orden d’a Ministra enumera as actuacions que as BRIF han realizau entre iste verano, en territorio nacional, destacando  de forma especial  l’incendio que arrasó mas de 13.000 hectarias en as Cinco Villas, asinas como os distintos incendios que tenioron puesto en as provincias de Jaén, Guadalajara, Castellón u Granada. Se mete de relieve, de vez, a mayor incidencia d’incendios en l’horario de treballo de tarde.

L’argumentación exposada en a orden ministerial sinyala o fundamental d’a labor d’istas brigadas helitransportadas. Como asinas tamién lo indican os abusivos servicios minimos, comunicaus a tarde antes de l’inicio d’a vaga quan habrían d’haber estau transmitius dos días antes, estando istes de quasi o 70% negando o dreito fundamental a la vaga, de vez que silencian as nuestras reivindicacions. Asinas se contrimuestra en a sentencia d’o 31 de marzo de 2015 que declara ilegals uns servicios minimos d’o 50%, imposaus en a chornada de vaga d’octubre de 2014.

Dende BRIF quieren fer veyer que istes feitos fan vistero o contradictorio d’a posición ministerial. “Por una parte se nos considera un servicio esencial d’emerchencias, indispensable en l’asistencia a las comunidatz autonomas. Mientres que por unatra parte as condicions laborals d’o colectivo BRIF no refleixan a importancia d’a labor desempenyada y citada tanto en a orden ministerial como argumento t’a imposición d’os servicios minimos, como en a descripción d’o mencionau colectivo en a propia pachina web d’o Ministerio d’Agricultura, Alimentación y Medio Ambient”.

Consideran que a negación constant d’as suyas peticions ye una muestra de “a falta d’intrés por o correcto funcionamiento d’o servicio” y consideran que o Ministerio d’Agricultura y Medio Ambient puede tomar cartas en l’asunto. “Se nos nombra servicio imprescindible d’o estau, como seria qualsiquier medio provincial contra incendios forestals, pedindo o que firmement creyemos que nos corresponde a totz por igual, a categoría profesional de bombero forestal, l’acceso a una segunda actividat y unas condicions laborals dignas acorde a o treballo de risgo que realizamos”.

Fuent: http://arainfo.org/2015/07/continua-la-huelga-de-brif/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.