Continan as movilizacions contra o recreiximiento de Yesa

O sabado se ferá un concierto en Artieda y o venient 15 d'aviento s'ha convocau una gran manifestación. As Cortes no demandan o cese d'os responsables d'a enrestida d'o 10 d'octobre

Vecins d'Artieda en a carretera t'o lugar

Vecins d’Artieda en a carretera t’o lugar

O recreiximiento de l’entibo de Yesa contina estando causa de movilizacions de refús de man de vecins d’Artieda y a suya redolada y de toda mena de organizacions meyoambientals, sindical, politicas u culturals, entre atras. Tant y mientres as Cortes han refusau con os votos d’o PP y o PAR y l’abstención d’o PSOE, demandar o cese de Gustavo Alcalde, Delegau d’o gubierno espanyol, y de Xavier de Pedro, president d’a Confederación Hidrografica de l’Ebro, por a responsabilidat que tienen en a enrestida d’a Guardia Civil contra os habitadors d’Artieda o pasau 10 d’octobre.

Iste sabado, Artieda acullirá una chornada d’homenache a totz os lugars que s’han engaronau u s’han albandonau en fer-se-ie un entibo. Lugars como Chanovas, Itoiz, Escó u Ruesta. Se i contará con a presencia tamién d’afectaus por as obras d’atros entibos como Biscarrués u Mularroya y con un concierto de La Ronda de Boltanya, colla mosical que siempre tien present a tematica rural y a problematica d’os entibos en o suyo repertorio.

A chornada rematará con un concierto d’as collas Alkol 96 y Serruchazo y con mosica de DJ’s. A organización ha presto una zona d’acampada y un bus que puyará dende Zaragoza, aturando en Uesca u Chaca, pero que no i ferá nueit, tornando d’o lugar dimpués d’o concierto de La Ronda.

A luita contra o recreiximiento continará tamién o venient 15 d’aviento quan, de conchunta con atras organizacions, COAGRET y Río Aragón han convocau una manifestación que, antimás de refusar o recreiximiento, amostrará o refirme a la represión que son tenendo os vecins d’Artieda con as expropiacions. Dende a enrestida d’a Guardia Civil d’o 10 d’octobre, son estaus siet personas, por agora, as clamadas como imputadas por alterar l’orden publico, atentau a la autoridat y lesions.

COAGRET y Río Aragón, han aprofeitau a enchaquia ta enrestir contra o Nuevo Plan de Cuenca de l’Ebro y han anunciau que presentarán en a siede d’a CHE una alegación sinyada por más de 25 organizacions ta que se retire o Plan.

As Cortes no demandarán responsabilidatz por as enrestidas d’a Guardia Civil

Tant y mientres, en as Cortes l’afer de Yesa contina d’actualidat tamién. A Proposición no de lei presentada por Chunta Aragonesista (CHA), a on que se demandaba o cese de Xavier de Pedro y Gustavo Alcalde -President d’a CHE y Delegadau d’o Gubierno espanyol en Aragón respectivament- ye estada refusada con os votos en contra de PP y PAR y l’abstención d’o PSOE. A iniciativa demandaba o suyo cese por estar “os incitadors d’a enrestida policial brutal, intorelable y inchustificable”, en parolas d’o diputaude CHA, Joaquín Palacín. De man de IU, qui tamién han refirmau a proposición, han calificau a o PP como o “Partiu d’a Porra” y l’acusan de “criminalizar as expresions de rebeldía pacifica”.

O PSOE, a tamás d’abstener-se ha criticau a freqüencia con que se fa servir a fuerza de man d’as “fuerzas de seguridat”. Os partius que refirman o gubierno, PP y PAR, han esfendiu l’actuación d’a Guardia Civil basando-se en “o dreito d’os funcionarios a fer o suyo treballo” y en que “o talle d’a carretera no yera solicitau ni autorizau”.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.