Continará l’enzarre en o CEM Pablo Remacha de Zaragoza

Activistas de movimientos socials y vecinas d'o vico zaragozano de Sant Chusé facioron un poder por evitar o desmantelamiento d'o servicio de mamografía en o centro

Foto: Marea Blanca Aragón

Foto: Marea Blanca Aragón

Dende o pasau luns, Marea Blanca, a Plataforma contra a Privatización d’a Sanidat d’Aragón y l’Asamblea d’o 15M en o vico zaragozano de Sant Chusé fan un enzarre en o Centro d’Especialidatz Medicas Pablo Remacha, de 8 d’o maitín dica as 20 h. d’a tarde. Fa honra como punto informativo y como “muro popular” a fin de privar o desmantelamiento de servicios como o mamografo, que ahiere estió desamontau d’o centro, u l’ecografo, que tamién podría tener a mesma fin en venients calendatas.

Ahiere de maitins s’asperaba o traslau d’o mamografo ta l’Hespital Miguel Servet, sin garra substitución, por orden d’a consellería de Sanidat, que mena Ricardo Oliván, o que deixa sin iste servicio a iste centro. Dende primers horas d’o maitín diversas personas s’enzarroron contando con refirme popular de vecinas d’o vico de Sant Chusé pa empachar o traslau de dito aparato. As personas enzarradas preboron de negociar con os responsables d’o centro medico y con os suyos treballadors y treballadoras sin exito.

A dirección decidió de trucar a la Policía Nacional espanyola debant d’a presencia de chent solidaria de diferents movimientos socials y d’o vico. Un fuerte despliegue policial d’a Unidat d’Intervención Policial (UIP) prencipió identificando a las personas astí congregadas (entre ellas o diputau aragonés Adolfo Barrena d’IU). A policía advertiba de sancions y pinyoras a las activistas presents.

Pese a la menaza de posibles detencions a las personas enzarradas, a la fin estioron desaloixadas libres. Pareixeba que o mamografo iba a estar-se a la fin en o centro, pero o fuerte despliegue policial, dimpués de desaloixar a empentons d’os arredols d’o Pablo Remacha a las personas solidarias que permaneixeban, consiguió que podesen trasladar o mamografo.

Debant d’iste feito, diversas asociacions vecinals, partius politicos u movimientos socials como Marea Blanca, AVV A Paz, PCE-PCA, CHA, IU u Puyalón de Cuchas condenaban o desmantelamiento de centros y servicios sanitarios, criticando amás a “contina criminalización d’a protesta social”.

Ista tarde i habrá una asamblea en o Centro Civico Teodoro Sánchez Punter a las 19 h. a fin de valurar diversas accions y o venient 17 d’octubre se celebrará una manifestación en defensa d’o CEM Pablo Remacha a las 19 h. dende a Pza. Reina Sofía de Zaragoza.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.