Contundent protesta en Leida contra os baixos pres d’a fruita

As protestas continarán dica que s'aconsigan uns pres mas chustos t'os productors

Protesta ahiere en Leida (Foto: VilaWeb)

Protesta ahiere en Leida (Foto: VilaWeb)

Bels 300 agricultors convocaus por Unió de Pagesos, JARC y Asaja protagonizoron ahiere viernes una d’as mobilizacions mas contundents d’os zaguers tiempos en as comarcas de Leida. Por protestar contra os baixos preus que se son pagando por a fruita dulza as organizacions agrarias reunioron una cinquantena de tractors, lanzoron uns 10.000 quilos de fruita y cremoron neumaticos debant d’os supermercaus Lidl y Aldi d’o poligono Neoparc d’a capital d’o Segrià. A mobilización remató con a intervención d’o Mossos d’Esquadra ta evitar que os manifestants dentrasen en os establimentos, que heban trancau puertas dende l’escomencipie d’a protesta. Os labradors avisan que as accions continaran.

Os tres sindicats agraris se metioron d’alcordo ta organizar de conchunta la protesta porque consideran de raso inchustificada la crisi de preus que ye vivindo o sector d’a fruita dulza ista campanya, pues no bi ha exceso d’ufierta. Creyen que os productors han aguantau a-saber-lo tiempo sin queixar-se y d’ixo s’en han aprofitau as grans cadenas de distribución, mas que mas as centroeuropeas con muita presencia en o continent, com Lidl u Aldi. Se queixan de que istas marcas presionan ta pagar-les preus irrisorios por a fruita, entre 25 y 30 centimos por quilo, por o que amenistan prous fainas ta poder cubrir os gastos de producción. Aseguran que un preu chusto por a fruita de qualidat s’habria de situar en o lineal entre un euro y meyo y euros y prou a sobent se troban ufiertas muit por debaixo. D’atra man, tamién coinciden en denunciar a inaccion d’as autoridatz de l’Estau y d’a Unión Europea ta viedar ista situación.

O president d’Asaja en Leida, Pere Roqué, ha afirmau que a d’iste viernes ha estau a primera d’una serie de protestas que continarán “dica que se’n salgan”. O responsable de fruita dulza de JARC, David Borda, ha estau contundent criticando que Bruselas se supedite, seguntes ell, a os intréses d’as cadenas de distribución. Qui tamién ha estau present en a protesta ha estau o coordinador nacional d’UP. Joan Caball ha asegurau que os “platos estricallaus” d’o veto ruso no los pueden pagar solament labradors y consumidors.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.