Convocada una concentración en a CHE pa exichir a prohibición d’o fracking en a cuenca de l’Ebro

Diversas plataformas demandan a la CHE que se prohiba a tecnica d'o fracking por os suyos risques medioambientals

LOGO-aragon-sin-fracking-289x300Maitín, chueves 27 de chunio de 2013, a las 11.30 horas, as diferents Plataformas contra o fracking d’a Cuenca de l’Ebro de conchunta con Cuenca Azul, o ret d’organizacions ecolochistas d’a Cuenca de l’Ebro, van a presentar en a Confederación Hidrografica de l’Ebro un documento pa exichir a prohibición d’ista tecnica en o conchunto d’a cuenca de l’Ebro.

A traviés d’os dos vocals que representan a las organizacions ecolochistas d’a cuenca, se tresladará ista petición a o pleno d’a CHE. Os portavoces explicarán a necesidat de prohibir o fracking en a totalidat d’a Cuenca de l’Ebro, por a incompatibilidat d’ista tecnica con a Directiva Marco de l’Augua. Tamién han solicitau una reunión con Xabier de Pedro, president d’a CHE, pa conoixer a suya postura a iste respecto.

Recientment expertos alemanes han desaconsellau a tecnica de “fracking” por os suyos risques medioambientals. “A cheneración de gas por medio de fracturación hidraulica u fracking no debe permitir-se a escala comercial por as grieus lagunas d’o conoiximiento actual sobre as suyas conseqüencias medioambientals”, ista ye a conclusión de l’equipo asesor d’o Gubierno alemán.

L’informe sobre ista polemica tecnica d’o Consello d’Expertos pa Qüestions Medioambientals (SRU) d’o gubierno alemán considera que o fracking “no cal en termins de politica enerchetica y que a suya contribución no ye esencial pa la reforma enerchetica que empentó a canciller Angela Merkel”. Amás, o texto d’istes scientificos alemanes aduz que l’apuesta por a fracturación hidraulica ni reduciría os pres d’o gas a livel nacional ni aumentaría a seguranza de suministro. En os zaguers meses a controversia arredol d’o fracking s’ha elevau en Alemanya por o debat entre qui esfienden o suyo uso por o suyo rendimiento economico, y meten como eixemplo os exitos aconsiguius en EEUU.

Os suyos detractors, por contra, subrayan os vertius toxicos en auguas subterranias, que dimpués afectan a l’augua pa consumo humano y a o medio ambient. A fracturación hidraulica se basa en a inchección a gran presión d’augua con compuestos quimicos en o subsuelo pa trencar as rocas y obtener o gas reteniu en o suyo interior. A propia coalición de Gubierno alemana, de centro-dreita, ha aturau un prochecto de lei sobre a fractura hidraulica a causa d’as diferencias internas en a Unión Cristianodemocrata (CDU), a formación d’a canciller Angela Merkel. Entre que EE.UU. s’amana cada vegada mas a la independencia enerchetica gracias a o “boom” d’a suya creixent industria d’o fracking, atros estaus, como Francia, han prohibiu o suyo emplego por os risques medioambientals.

Fuent: http://arainfo.org/2013/06/convocada-una-concentracion-en-la-che-para-exigir-la-prohibicion-del-fracking-en-la-cuenca-del-ebro/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.