Convocada una manifestación antifaixista o viernes 18

La convoca Zaragoza Antifaixista baixo lo lema "Le dicen democracia y no'n ye"

Cartel d'a manifestación

Cartel d'a manifestación

Como todas as anyadas, arredol d’o 20 de noviembre, cabo d’anyo d’a muerte de Franco se fan manifestacions antifaisxistas en muitas ciudatz de l’estau. O venient 18 de noviembre a plataforma Zaragoza Antifaixista en ha convocau una que marchará por a ciudat de Zaragoza, dende a Plaza Diego Velázquez dica a Plaza d’a Memoria Historica, en o vico de Torrero.

A triga d’o recorriu y a fin d’a manifestación s’ha feito, seguntes a organización por tres razons: por esnavesar o vico de Torrero “caracterizau por as luitas socials, por o sinyaler d’a plaza y l’antiga garchola y como critica a que una garchola leve lo nombre de “As 13 Rosas”.

O manifiesto que se leyerá a la fin d’a manifestación y que ya se puet leyer en o blog d’a Coordinadora Antifaixista de Zaragoza, critica que a muerte de Franco “no suposó un crebar finitivo con ixe rechimen” y que a suya herencia ye “un legau de chueces, militars, policias y guardia civils que estioron complices y echecutors d’as atrocidatz que fació o franquismo”. Tamién i denuncian a represión a las luitas y movimientos socials dende as anyadas 70 dica o 15M.

Antimás, mientres tot lo mes, se ye organizando toda mena d’actividatz baixo o titol de “Noviembre Antifaixista” feitas por as Coordinadoras Antifaixistas de Zaragoza y Eixeya, o Bloque Independentista de Cuchas. O chueves 17 se ferá en Eixeya d’os Caballers a presentación d’o libro “Reflexions d’un comunista: Por a libertat a tierra y o treballo”. Tamién se facioron bells actos en atros puestos como Andorra y Uesca.

As chornadas rematarán a semana venient con más charradas y tallers y un concierto de Rojo Cancionero o sabado en a sala Arrebato, en o vico d’A Madalena.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.