Convocadas as Listas d’Interinos de Luenga Aragonesa ta Infantil y Primaria

O curso venient creixerán as horas de clases d'aragonés en infantil y primaria

Anvista d'Ansó, uno d'os lugars que han empecipiau iste curso as clases d'aragonés en Primaria. (Foto: Wikipedia)

Anvista d’Ansó, uno d’os lugars que han empecipiau iste curso as clases d’aragonés en Primaria. (Foto: Wikipedia)

Dimpués d’a publicación, a pasada semana, d’o conoixiu como “Decreto d’Interinos”, ahiere luns se publicoron cinco resolucions d’o Director Cheneral de Chestión de Personal d’a Consellería d’Educación, en as quals s’ixampla a lista que existiba de mayestros con perfil “luenga aragonesa”, y como novedat important, se’n crea quatre mas, con perfils: “luenga aragonesa – variedat ansotano”, “luenga aragonesa – variedat cheso”, “luenga aragonesa – variedat aragonés d’o Sobrarbe” y “luenga aragonesa – variedat baixorribagorzano”.  Fuents d’Educación han confirmau a Arredol que istas listas servirán ta Infantil y Primaria, y que en o curso 2014-15 ye previsto un creiximiento important d’as horas y plazas d’istas dos etapas, considerando-se prioritaria l’amostranza de l’aragonés en Educación Infantil. Tamién remarcan a importancia de contar con suficients mayestros en as listas d’interinos ta poder ixamplar ixa ofierta.

Os candidatos a fer parte d’istas listas han de tener o titol de mayestro u equivalent y no estar ya funcionarios de carrera d’ixe mesmo cuerpo, y tienen de plazo dende hue dica o 5 de mayo ta presentar as solicitutz. Seguntes as resolucions, a ordenación d’os candidatos de cada lista se fará con a puntuación que resulte d’un doble criterio: una preba de conoximiento de l’aragonés (consistent en un exercicio oral y unatro escrito) que tendrá una valgua d’o 60%, siempre que o candidato resulte apto, y una baremación de meritos relacionaus con a luenga aragonesa, que contará un 40%. Os meritos valuraus son a experiencia en l’amostranza d’a luenga aragonesa (sobre tot en Infantil y Primaria en centros publicos, pero tamién conta a experiencia docent en atras etapas y centros, mesmo en asociacions culturals), os meritos de formación en luenga aragonesa, y as publicacions d’investigación pedagochica u didactica.

En o texto publicau, a Dirección Cheneral de Personal indica que ye voluntat d’o Departamento “guaranciar l’amostranza de l’aragonés en as suyas diferents variedatz en os Centros Docentes d’a Comunicat Autonoma que impartan u deseyen impartir dita luenga“. Una declaración de principios prometedera, que contrasta con os termens d’a lei de luengas aprebada fa menos d’un anyo, y que asperamos que pueda levar l’aragonés ta muitas mas escuelas.

4 Rispuestas a Convocadas as Listas d’Interinos de Luenga Aragonesa ta Infantil y Primaria

  1. FERNANDO RIVAS Y TOBEÑA

    Una notizia bien acollida y que mos imple de goyo a los fabláns, en el caso de yo baixoribagorzán, que encara quedam, encara que ya no bibam en Aragón

  2. Pingback: Convocadas as listas d’interinos de Luenga Aragonesa ta Infantil y Primaria » AraInfo | La Franja

  3. Menuda tomadura de pelo. Para enseñar una única lengua, 4 o 5 listas extraordinarias de interinos, con un reparto que no sigue ningún criterio logísitco o filológico, y con una consideración inferior a la que disfrutan el castellano o el catalán en nuestro territorio. Mal estaban las cosas y mal seguirán.

  4. Pingback: Convocadas as listas d’interinos de Luenga Aragonesa ta Infantil y Primaria | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.