Convocan una manifestación d’emparo a “os 8 de Yesa” a vispra d’o chuicio

Os 8 de Yesa concaran una acusación de más de 37 anyos de garchola por una concentración contra o recreiximiento de l'entibo

Un d'os momentos d'a chornada solidaria en Chaca (Foto: 8 de Yesa)

Un d’os momentos d’a chornada solidaria en Chaca (Foto: 8 de Yesa)

Iste lunes 23, plegará en o chudgau numer 1 de l’Audiencia Provincial de Zaragoza o chuicio d’o caso conoixiu como d’os “8 de Yesa”. A vispra, s’ha convocau una manifestación d’emparo a os acusaus, que prencipiará a las 12:00 en l’entorno d’a seu d’a Confederación Hidrografica de l’Ebro (CHE), an que s’aspera a presencia de numbrosos colectivos y organizacions de toda mena.

Os 8 de Yesa concaran una acusación d’un total de mas de 37 anyos de garchola por diferents cargos, debiu a los feitos d’o pasau 10 d’octubre de 2012. Ixe diya, yera prevista la presencia de funcionarios en Artieda ta fer tramites d’expropiación d’as tierras d’o lugar, y continar con obras de l’entibo de Yesa. Os “8 de Yesa” facioron parte d’una concentración pacifica chunto con atros vecins y activistas que estió reprimida por un equipo antidisturbios d’a Guardia Civil, deixando quantos ferius.

Os imputaus han sinyalau dreitament a Gustavo Alcalde, Delegau d’o gubierno espanyol en Aragón, y a Xavier de Pedro, t’a part d’alavez president d’a CHE, como os responsables d’a enrestida d’a Guardia Civil y d’o chuicio que son concarando y t’o que demandan a total absolución .

As obras d’o recreiximiento de Yesa s’han qüestionau a-saber-lo, por os suyos impactos ecolochicos y socials, antimás de por totz os costes adhibius que ye tenendo, multiplicando qualques vegadas o presupuesto que teneba en primeras, u por os periglos advertius por cheologos y tecnicos y que han levau a desaloixar urbanizacions d’a parte navarra de l’entibo.

Dende fa bell mes, s’ha feito una campanya de refirme que ha levau a representants d’os imputaus por muitos lugars y ciudatz d’Aragón explicando a suya anvista. Tamién s’han feito a saber que actos, como a concentración que se fació en Madrit o pasau 2 d’abril, u a chornada solidaria que arrocló a cientos de personas en Chaca o 1 de mayo. A suya demanda d’absolución tamién ye plegada en l’administración, aconseguindo declaracions institucionals de concellos, comarcas, diputacions provincials y as Cortes d’Aragón.

T’a manifestación d’o 22, s’ha organizau autobuses dende Sangüesa y Artieda que levarán a chent d’ixas redoladas ta Zaragoza. Tamién en os zaguers diyas s’han difundiu videos con as razons d’os 8 de Yesa y una campanya de selfies en solidaridat con os imputaus y refirmando a manifestación.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.