Convocan una manifestación en refirme a los denunciaus por a consellera d’Educación

Dolores Serrat denunció a dos estudiants de secundaria que supuestament participoron en "l'aición tupper" por "coaccions".

Aición tupper d'o pasau 12 de chinero (Foto: El ventano)

Aición tupper d’o pasau 12 de chinero (Foto: El ventano)

A polemica por a clamada “aición tupper” contina tensando más, si ye posible, as relacions entre a consellería d’Educación y a comunidat educativa. Dimpués d’ista aición, a on que bells representants d’a Marea Verda metioron tuppers en una farola d’a carrera Alfonso amanada t’o domicilio en Zaragoza de Dolores Serrat, como protesta por a suya politica educativa, a consellera denunció por supuestas coaccions a Hugo y Rebeca, dos estudiants de secundaria que supuestament i participoron.

A tensión continó quan una concentración de refús por as denuncias y a politica educativa en a carrera Alfonso estió viedada por a Delegación d’o gubierno espanyol porque “o domicilio d’a consellera ye entre os numers 18 y 33” d’ixa carrera. Agora, a Marea Verda, refirmada por arrienda colectivos y organizacions de toda mena, torna a convocar movilizacions en lo que pareix que será un conflicto largo y furo.

O viernes 1 se ha convocau, baixo o lema “No a la criminalización de protestas pacificas”, una concentración debant d’os chudgaus d’a Plaza d’o Pilar a las 9:30. A concentración prebará de fer vistero o refirme d’a comunidat educativa a Hugo y Rebeca, qui concararán en ixe maitin o primer trango d’o chuicio por coaccions por lo penal, que ha provocau a denuncia d’a consellera. Marea Verda clama a qui no pueda ir-ie a que “faiga vistero en o suyo centro educativo” de bella traza o refirme ta ista luita.

Os tres partius d’a oposición PSOE, CHA y IU han exichiu a la consellere que retirase a denuncia contra os dos zagals, encara que en un primer inte refusoron, con matices, a conoixida como “aición tupper”.

O sabado 2 continan as movilizacions, en ista ocasión con una manifestación que prencipiará a las 19:30 en a Plaza Espanya baixo lo lema “Ni criminalización ni prevaricación. #Serratdimision” y a on que s’aspera a presencia de muitos colectivos d’a ciudat y d’o país. Marea verda remera que a denuncia contra Hugo y Rebeca no estió feita por a policía, sino por a propia Dolores Serrat,  y creye que ista denuncia “ye una muestrade l’actitut de qui no tiene garra inconvenient en pasar por dencima d’os dreitos y libertatz constitucionals d’a resta (autoritarismo), con tal d’imposar as entivocadas politicas neoliberals que son enronando Espanya”

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.