Convocan una protesta laicista contra a presencia de autoridatz en os actos de Sant Valer

Demandan a los representants publicos que se mantiengan neutrals en afers relichiosos.

Protesta en Sant Valer de 2011 (Foto: Primo)

Protesta en Sant Valer de 2011 (Foto: Primo)

Ya ye tradición que MHUEL se manifieste o diya de Sant Valer en pasar a Corporación Municipal de Zaragoza en actos relichiosos. Manimenos, l’Asociación Movimiento Enta Un Estau Laico (MHUEL) remera que “o pasau mes de chunio en a zaguer procesión d’o diya d’o Corpus, se nos viedó fer a concentración en a plaza d’o Pilar que bi heba prevista, en protesta por l’asistencia de representants publicos en actos confesionals”.

Dende l’asociación s’entendió que a Delegación d’o Gubierno espanyol yera conculcando un dreito constitucional. En istas circuntancias, MHUEL reclamó os suyos dreitos debant d’os tribunals. A la fin, o Tribunal Superior de Chusticia d’Aragón dió la razón a MHUEL qui denuncioron istos feitos y demandó a dimisión y o cese d’o delegau d ‘o gubierno espanyol en Aragón.

Con ista enchaquia, ista anyada, MHUEL demanda especialment “o refirme de amigos, amigas y simpatizants que comparten con nusatros ista reivindicación. Se ruega convidar a participar y fer espardir a convocatoria, como siempre con as consignas de participación de MHUEL”. L’acto se ferá en a Plaza d’a Seu de Zaragoza, iste martes a las 10:00.

MHUEL denuncia l’asistencia d’as institucions publicas de l’Estau y d’os representants suyos t’actos de marcau signo confesional en considerar que “truca con l’aconfesionalidat de l’Estau espanyol replegada en l’articlo 16.3 d’a Constitución”. Por ista razón han convocau un actos de protesta por a participación d’a Corporación Municipal de Zaragoza en a procesión d’a festividat de Sant Valer. A procesión se ferá iste martes y bi irá o primer l’alcalde d’o PSOE, Juan Alberto Belloch, en comitiva oficial dende a Casa Consistorial dica la Catedral catolica d’a Seu, a on que asistirá a una Misa Pontificial presidida por l’Arzobispe.

MHUEL reivindica que “garra institución publica y os representants suyos, ya sigan municipals u de l’Estau, participen en actos relichiosos y se mantiengan neutrals en demba relichiosa, en a suya condición de representants de totz os ciudadans, independientement d’as creyencias u no creyencias que tiengan que perteneixen a la demba privada de cada persona”.

 

Fuent: http://arainfo.org/2013/01/mhuel-convoca-una-protesta-por-la-asistencia-de-instituciones-publicas-en-actos-de-marcado-signo-confesional/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.