Convocan vaga estudiantil en Aragón o 26 de febrero contra a LOMCE y o decreto “3+2”

A vaga será en ensinyanzas medias y universitarias. Os sindicatos estudiantils protestan por a puyada de taxas con o "3+2" y por a educación publica de calidat

huelga26f_trilinguewebO venient 26 de febrero, sindicatos estudiantils aragoneses d’ensinyanzas medias y universidat ha convocau vaga en protesta por a nueva reforma universitaria d’o sistema de graus y masters “3+2” y en contra d’a LOMCE.

En rueda de prensa en as escaleras d’o Edificio Paraninfo d’a Universidat de Zaragoza, Víctor Lázaro, Laura Comín y Lara Gutiérrez, representants d’o Comité de Vaga, han explanicau o porqué d’ista convocatoria.

Víctor Lázaro ha comentau que “han imposau una reforma d’os graus universitarios que suposará a segregación d’o estudiantau entre qui pueda pagar-se dos anyos de master y qui no“. Tamién ha recalcau que dende 2009 as taxas han puyau un 32%, apuntando que l’incremento con os masters de dos anyos será muito mayor privando d’una educación de calidat a qui no pueda pagar-lo”.

Laura Comín ha dito que “se reduce a formación que reciben qui nomás pueden acceder a pagar-se un grau“, asinas como o “contexto de retalles” en a universidat publica, destacando que as facultatz se son esmicazando“, chunto a la “falta de materials“. “As taxas no deixan de puyar mientres que as nuestras becas no deixan de baixar”, ha finalizau.

Lara Gutiérrez ha declarau que “no permitiremos que nos furten o nuestro dreito a una educación publica y luitaremos en as carreras ta frenar a mercantilización d’a ensinyanza“.

Amás d’os piquetz en os recintos universitarios y en os institutos dende as 7:30 d’o maitín, se realizarán qualques manifestacions en diferents localidatz aragonesas. En Zaragoza a cita será a las 11 d’o maitín en a Pza. Sant Francisco en a puerta d’o campus universitario, en Uesca será a las 12 h. en a Pza. Nabarra, en Teruel será a las 11 h. en o campus universitario, en Samianigo a las 11:30 h. en o IES Alberto Magno y en Chaca a las 10:30 h. en o IES Pirineos.

Antes d’iste diya, se ferá un enzarre en o edificio Interfacultatz d’a Universidat de Zaragoza o diya 23, dende as 20 h. dica as 7:30 a l’atro’l diya. Mientres iste acto de protesta se ferán charradas y debatz, amás d’un desayuno solidario.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.