Cospedal arriba a l’Audiencia entre chilos y muestras d’emparo

Arenas y Cascos admitioron ahiere a o chuez descontrol en as donacions a o PP

Mª Dolores de Cospedal. Foto: PP Madrid (CC-BY)

Mª Dolores de Cospedal. Foto: PP Madrid (CC-BY)

A secretaire cheneral d’o Partiu Popular, María Dolores de Cospedal, ha plegau en l’Audiencia Nacional espanyola a medio maitín pa declarar como testigo a o chuez Pablo Ruz, instructor d’o ‘caso Bárcenas‘. Decenas de personas la aguardaban, belunas pa chilar-le y belatras pa emparar-le. I ha habiu momentos de tensión entre totz dos grupos y, mesmo, enfrontinamientos verbals.

Cospedal habrá de dar explicacions sobre a suposada financiación irregular d’o PP y o pago de sobresueldos en negro a qualques directivos d’o partiu. Amás, habrá de responder a las acusacions de Luis Bárcenas, que dició que a secretaire cheneral heba recibiu dos pagos por valor de 45.000 euros en total entre os anyos 2009 y 2010.

Seguntes a versión de Bárcenas, o primer pago se produció en 2009 quan o partiu decidió de liquidar a caixa d’as donacions dimpués d’esclatar o ‘caso Gürtel‘. O segundo, de 25.000 euros, s’habría realizau en 2010 quan o PP recibió 50.000 euros d’a devolución d’una deuda a o PP gallego. Unas cantidatz que, seguntes Bárcenas, tamién recibió o president d’o gubierno espanyol, Mariano Rajoy.

Mientres a suya declaración o pasau 15 de chuliol en l’Audiencia espanyola, Luis Bárcenas dició que totz dos pagos de 25.000 euros s’entregoron en billetz de 500 euros en sobres de color marrón. Con tot, negó tener os recibos d’istas operacions.

O extresorero d’o PP, engarcholau en Soto del Real dende o pasau 27 de chunyo, tamién dició que o cherent d’o PP de Castiella-La Mancha, José Ángel Cañas, recibió una comisión de 200.000 euros en pagas de l’adchudicación d’o servicio de limpieza a o concello de Toledo. Mesmo, Bárcenas entregó un recibimiento sinyau por Cañas a o chuez Pablo Ruz. Una operación que afectaría tamién a María Dolores de Cospedal porque mientres aquella epoca yera a presidenta d’o PP en a Comunidat de Castiella-La Mancha.

Arenas y Cascos admiten a o chuez descontrol en as donacions a o PP

Ahiere os dos exsecretaires chenerals d’o Partiu Popular, Javier Arenas y Francisco Álvarez-Cascos, admitioron descontrol en as donacions a o partiu. Ixo sí, totz dos dicioron, en unas declaracions quasi identicas, que desconoixeban a existencia d’os documentos de Luis Bárcenas, y negoron taxativament haber recibiu garra mena de sobresueldo. Continoron, por tanto, mantenendo o discurso cheneral d’o Partiu Popular y, seguntes l’advogau de l’acusación, una d’as frases mas repetidas en as dos declaracions estió: ‘Isto no lo recuerdo.’

A plegada en l’Audiencia espanyola de Francisco Álvarez-Cascos estió especialment movida, ya que estió repropiau por una vintena de manifestants, que le clamoron ‘ladrón’ y ‘churizo’, entre mas faltadas. Encara que tanto Cascos como Arenas y De Cospedal declaran en calidat de testigos, cada vegada mas relevancia prenen istas declaracions. Manimenos, o extresorero d’o PP, Luis Bárcenas, los acusó d’haber cobrau diners d’a caixa B d’o partiu en sobres. Amás, seguntes publicaba El Mundo o luns, Bárcenas continó cobrando d’o PP, con a nomina mas alta d’o partiu, en 2010 y 2011. Tot isto choca con a declaración d’o president espanyol, Mariano Rajoy, que dició en o congreso que o extresorero ya no formaba parte d’o partiu aquells anyos. A resultas d’ista revelación, a oposición tornó a pedir a dimisión de Rajoy, que considera que ha mentiu en o congreso.

O sucesor de Bárcenas como cherent d’o PP admite haber cobrau en negro

Por si no n’i hese prou con isto, o excherent d’o Partiu Popular, Cristóbal Páez, que substituyó a Luis Bárcenas en o cargo, admitió ahiere a o chuez Pablo Ruz haber recibiu os pagos que figuraban a o suyo nombre en a documentación que Bárcenas heba entregau sobre a suposada contabilidat B d’o partiu. Asinas lo confirmoron fuents chudicials dimpués d’a comparecencia de Páez, que duró amán de dos horas. As mesmas fuents adhibioron que se tractaba de dos sobresueldos de 6.000 euros en concepto de ‘gratificación’ recibius os meses d’abril y chunyo de 2008.

Fuent: http://www.vilaweb.cat/noticia/4138890/20130814/cospedal-arriba-laudiencia-escridassades-mostres-suport.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.