Crefco demanda un calendario d’inversions pa la reobridura d’o ferrocarril de Canfranc

Crefco s'ha concentrau debant d'as puertas d'o gubierno aragonés. O consellero d'Obras Publicas d'o gubierno aragonés veye "factible" a reobridura d'a linia

Gara de Canfranc (Foto: Wikipedia)

Gara de Canfranc (Foto: Wikipedia)

En o maitín d’iste martes, Crefco, organización que luita por a reobridura d’a linia ferroviaria entre Canfranc y Olorón s’ha concentrau debant d’a siede d’o Gubierno d’Aragón pedindo un calendario d’inversions y prochectos pa fer posible a reobridura d’iste tramo en l’anyo 2020. Crefco s’ha concentrau aprofitando a reunión d’o Grupo de Treballo Quatripartito pa la Reobridura d’a Linia Pau-Canfranc.

Rafael Fernández de Alarcón, consellero d’Obras Publicas d’o gubierno aragonés, ha afirmau que a reobridura d’a linia ye “factible”. Manimenos a representación francesa ha declarau que cal actualizar os estudeos sobre a linia. Manuel Niño, secretaire cheneral d’Infraestructuras d’o ministerio de Fomento espanyol ha destacau que queda bell estudeo complementario por parte d’os estaus espanyol y francés pa poder optar a l’autorización de puesta en servicio d’a linia, treballo que será realizau en os venients meses.

Entremistanto, dende Crefco, o suyo portavoz, Diego Colás, ha comentau que “no i hai garra razón obchectivapa dubdar d’a plegada d’os trens en Bedous, destacando que “i habrá servicio ferroviario a 25 km. d’a muga”.

Colás ha criticau as chicotas alportacions presupuestarias d’o Gubierno d’Espanya en comparación con as d’o Gubierno francés, que bi invertirá 100 millons d’euros.

Pa Crefco, a privación de paso de cambions por o Somport y as limitacions en o paso d’o Portalet “son un estimulo mas pa ir dando os trangos precisos a fin que o ferrocarril de Canfranc siga operativo en a fecha planteyada por as rechions y solucione definitivament as dificultatz que pa o transporte de mercancías sufren os territorios situaus en todas dos vertients d’o Pirineu central”.

Colás considera que cal un buen empentón en a inversión en o costau aragonés y asinas “presionar” pa reobrir os 25 km. d’a linia en l’atro costau d’a muga.

Una rispuesta a Crefco demanda un calendario d’inversions pa la reobridura d’o ferrocarril de Canfranc

  1. Pingback: Crefco demanda un calendario d’inversions pa la reobridura d’o ferrocarril de Canfranc » AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.