Crefco piensa que o Gubierno d’Aragón torna a fracasar con a reubridura d’o Canfranc

Ta Crefco, a D.Ch.A. s’amuestra incapable d’esfender os intreses d’Aragón difuera d’as suyas mugas.

Crefco en La Moncloa demandando a reubridura d'o Canfranc

Crefco en La Moncloa demandando a reubridura d’o Canfranc

Rematada a cumbre Espanya-Francia, con o resultau decepcionant de una nueva declaración de buenas intencions, a Coordinadera por a Reubridura d’o Ferrocarril Canfranc-Aulorón (Crefco) creye que “o texto que reculle ista declaración más pareix bell talla-pega d’atras trobadas que bell texto desembolicau a resultas d’a que tenió puesto iste 27 de noviembre”. Os dos gubiernos “i reconoixen a importancia d’enantar en o estudeo d’o prochecto de reubridura d’a línia ferroviaria Zaragoza-Pau-Canfranc y proposarán a Aragón y Aquitania a celebración de una trobada d’a colla de treballo quatripartita mientres o primer trimestre d’o 2014”, encara que i no confirman calendatas ni inversions, tampoco no si irán os dos gubiernos, ta Europa a demandar-ie financiación comunitaria.

Ta más vergüenya t’o Gubierno d’Aragón, opina Crefco, a Comision Europea ha refusau a suya demanda de 3,93 millons de Euros comunitarios ta financiar os estudeos tecnicos previos por mancar-ie bells aspectos tecnicos y financiers que, a Comisión, opina que son muitismo importants t’o prochecto.

T’a Coordinadera “os dos sucesos contrimuestran que iste Gubierno de Aragón, como o suyo antecesor, s’amuestra incapable de esfender os intreses d’o país en Bruselas y Madrid. Denguna d’as buenas parolas que ha recibiu a reibridura en os zaguers meses se ha traduciu en feitos. Una vegada totz que os argumentos economicos, socials e ambientals son dencima d’a mesa, os feitos han d’estar calendatas e inversions t’a linia.”

Crefco no meterá ficacio en más declaracions de buena voluntat d’os Gubiernos espanyol y aragonés mientres no vaigan acompanyadas de feitos que sí pareixen desfrutar atros territorios de l’estau que han feito os suyos quefers y ferán a devantadera, en bells quince diyas, una conexion ferroviaria dreita con Paris.

Crefco creye antimás que ye preocupant o encerrinamiento d’o Gubierno d’Aragón con a Travesía Central d’os Pirineus, prochecto innecesario y inreyalizable ni sisquiera a meyo plazo y que tien tot por fer, no como en a linia d’o Canfranc que poderba estar ubierta en 2020 y no le calen guaires diners. Crefco creye ista una grandiza error estratechica, quan no se veye obligada a pensar-se que, d’ista mena, o Gubierno de Aragón preba de amagar as suyas miserias con o Canfranc. 

Una rispuesta a Crefco piensa que o Gubierno d’Aragón torna a fracasar con a reubridura d’o Canfranc

  1. Pingback: Crefco piensa que o Gubierno d’Aragón torna a fracasar con a reubridura d’o Canfrán | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.