Crimea proclama a independencia y demanda l’ingreso en a Federación Rusa

O 96,77% d'os votants en o referendum d'ahiere, a favor d'unir-se a Rusia

Edificio d'o parlamento de Crimea. Foto: Wikipedia

Edificio d’o parlamento de Crimea. Foto: Wikipedia

O Consello Supremo (Parlamento) de Crimea ha proclamau iste maitín a independencia d’a peninsula, seguntes ha informau l’organo lechislativo en o suyo puesto web. A declaración d’independencia (aprebada en primera instancia fa seis días y que yera pendient d’o referendum de ratificación d’ahiere) ha estau aprebada por 85 d’os 100 diputaus que composan o Parlamento crimeano.

O Parlamento ha pediu a las Nacions Unidas y a totz os estaus d’o mundo que reconoixcan a independencia d’a Republica de Crimea. As autoridatz crimeanas tamién han solicitau a Moscú que considere a suya petición ta escayeixer un nuevo sucheto d’a Federación Rusa, como republica constituyent.

Seguntes o recuento oficial d’o referendum d’ahiere, o 96,77% d’os votants votoron a favor de l’anexión a Rusia. O 2,51% votoron a favor de mantener-se como republica dentro d’Ucraína. A participación estió d’o 83,1%. O referendum se celebró en l’autonomía de Crimea y en a ciudat de Sebastopol.

Istas cifras embrecan que, necesariament, crimeanos no perteneixients a la mayoría etnicament rusa (que forma o 58% d’a población de l’autonomía de Crimea y o 72% de Sebastopol) tamién habrían emparau l’anexión a Rusia. Tanto o gubierno d’Ucraína como as organizacions d’o pueblo tartaro de Crimea heban clamau a o boicot d’o referendum.

O Parlamento ruso debatirá l’ingreso de Crimea o viernes

Ye previsto que a camara baixa d’o Parlamento ruso, Duma, debata una proposición de lei que facilitaría l’anexión de Crimea a Rusia iste mesmo viernes 21.

As autoridatz crimeanas dicen que o procedimiento ta l’anexión podría estar listo en o plazo de dos semanas. T’o 30 de marzo, os diputaus de Crimea han previsto de cambiar de fuso horario. Si dica agora a peninsula, como toda Ucraína, yera dentro de l’horario d’a Europa oriental, d’aquí a dos semanas pasará a l’horario de Moscú.

Unatra mida que Crimea ha previsto adoptar ye l’abandono d’a hrivnia ucrainiana ta pasar a o rublo ruso.

Fuent: http://www.nationalia.cat/ca/noticies/1816

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.