Cuba y Estaus Unius inician o restableiximiento d’as suyas relacions dimpués de 53 anyos

Obama iniciará en as camaras lechislativas o proceso pa meter fin a o bloqueu economico a Cuba. S'ha aliberau qualques presos dende Cuba y Estaus Unius

Barack Obama (Foto: Biquipedia)

Barack Obama (Foto: Biquipedia)

Ahiere o president d’Estaus Unius, Barack Obama, anunció l’inicio d’o restableiximiento d’as relacions diplomaticas entre o suyo país y Cuba. Obama declaró que «no podemos continar fendo o mesmo que mientres 50 anyos y asperar un resultau diferentL’isolamiento a Cuba no ha funcionau«, en referencia a o bloqueu economico que sufre Cuba dende fa 53 anyos.

Obama ha anunciau a obridura d’una nueva embaixada en L’Habana, asinas como viaches d’altos cargos de l’administración norteamericana ta tierra cubana pa negociar o proceso. Os residents de nacionalidat cubana en Estaus Unius tamién viyerán un incremento d’o limite d’invío de divisas ta Cuba, dende os 500 dolars cada tres meses dica os 2.000. Tamién s’acabarán as restriccions sobre os viaches entre os dos estaus.

Sobre a fin d’o embargo a Cuba, Obama ha reconoxiu «que no ye facil» en estar dentro d’as leis estadounidenses, pero que iniciará o proceso pa que o congreso levante o bloqueu y ferá os esfuerzos necesarios pa meter-le fin.

O president Obama ha declarau que «hue queremos aduyar a os cubanos a fer a suya vida una mica mas facil, mas libre, mas prospera» y s’ha referiu a o lider revolucionario cubano José Martí, conoixiu como «l’apostol d’a independencia de Cuba», citando a suya frase «A libertat ye o dreito de toda persona a estar honesta», concluyendo o suyo discurso con a frase en castellano «Todos somos americanos«.

Raúl Castro (centro) (Foto: Calixto N. Llanes Vila)

Raúl Castro (centro) (Foto: Calixto N. Llanes Vila)

Raúl Castro, president cubano, tamién realizó un discurso en que s’amostró satisfeito por l’inicio d’a reobridura d’as relacions entre os dos países americanos. Manimenos ha declarau que «ixo no quiere decir que o prencipal s’haiga resuelto, o bloqueu economico, comercial y financiero que provoca enormes danyos a o nuestro país y que debe cesar«. «Debemos aprender l’arte de convivir de traza civilizada con as nuestras diferencias«, ha adhibiu.

Raúl Castro ha demandau a o gubierno d’Obama que «adopte midas pa amillorar o clima bilateral y alcanzar a normalización d’os vinclos entre os dos países, basaus en os prencipios d’o dreito internacional y en a Carta Internacional de Dreitos Humanos d’a ONU«.

Tanto o gubierno cubano como o gubierno estadounidense han liberau a qualques presos. Estaus Unius ha aliberau a os tres presos que quedaban engarcholaus de «Os Cinco», acusaus d’espionache por os Estaus Unius., decisión que seguntes Castro «mereixe o respecto y reconoiximiento de tot o pueblo cubano».

Dende Cuba s’ha aliberau a un espía d’orichen cubano, posiblement un achent d’a CIA, asinas como atras personas sobre as que o gubierno estadounidense habría mostrau intrés y beneficios penals a atros reclusos, seguntes a lei cubana.

Tamién Cuba ha aliberau a o excontractista estadounidense Alan Gross, condenau a 25 anyos de garchola dende 2009 y que queda libre por «razons humanitarias».

Castro ha reconoixiu y ha agradeixiu as negociacions d’o Papa Francisco, asinas como as d’o gubierno de Canadá pa amillorar as relacions entre as administracions cubana y estadounidense. Castro ha declarau que as negociacions s’han realizau «sin renunciar a dengún d’os prencipios d’a Revolución» y ha destacau que «agora levamos ta debant un modelo economico socialista que siga prospero y sostenible«.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.